Алтынньы 6 күнүгэр Москва уобалаһын Подольскай куоратыгар «X-Ti Лидер» картодром территориятыгар «Үрдүк технологиялаах мэдиссиинэ көмөтө» Аһымал пуондатын өйөбүлүнэн анал байыаннай дьайыы кыттыылаахтарыгар адаптивнай картинг оскуолатын үөрүүлээхтик аһыы буолла диэн, Саха Өрөспүүбүлүкэтин РФ Бэрэсидьиэнигэр бастайааннай бэрэстэбиитэлистибэтин пресс-сулууспата иһитиннэрэр.
Бу тэрээһиҥҥэ Саха Өрөспүүбүлүкэтин РФ Бэрэсидьиэнигэр бастайааннай бэрэстэбиитэлин бастакы солбуйааччыта Александр Сафронов уонна М.Е. Николаев аатынан «Бэс Чагда» санаторий генеральнай дириэктэрэ Георгий Трофимов сырыттылар.
Аһыллыы кэмигэр ыалдьыттарга илиинэн салайарга толору сөп түбэһиннэриллибит автокарттары көрдөрдүлэр. Маннык тиһик суоппар туругун уонна куттала суох буолуутун үрдүк таһымҥа тутан туран, массыынаны илиинэн эрэ түргэтэтэргэ, тохтоторго уонна салайарга кыах биэрэр.
Оскуола үөрүүлээх аһыллыытыгар кыттыбыт «Үрдүк технологиялаах мэдиссиинэ көмөтө» Аһымал пуондатын бэрэссэдээтэлэ уонна «Газпромбанк» АО вице-бэрэсидьиэнэ Сергей Фурсенко быйыл кулун тутар ыйга «Бэс Чагда» санаторийга массыына ыытарга үөрэтэр хас да симуляторы бэлэхтээбитэ. Бу тиһиктэр байыаннай сулууспалаахтар эчэйии уонна бааһырыы кэнниттэн когнитивнай уонна моторнай функцияларын чөлүгэр түһэрэргэ туһаныллаллар.
Симулятордарга уонна дьиҥнээх автокарттарга эрчиллии болҕомтону түмэри, түргэнник хамсанары, тулалыыр эйгэни ылынары чөлүгэр түһэрэргэ көмөлөһөр. Ону тэҥэ, быччыҥ өйдөбүлүн сөргүтэргэ уонна ноҕуруускаларга үөрэнэргэ куттала суох эйгэни үөскэтэр. Бу барыта анал байыаннай дьайыы кыттыылаахтарын толору реабилитациялыырга ураты суолталаах. Маны таһынан, маннык дьарык успуордунан дьарыктаныы нөҥүө уопсастыбаҕа киирэргэ көмөлөһөн, долгуйар-депрессивнэй туруктан тахсарга кыах биэрэр.
Үөрүүлээх тэрээһин түмүгэр ыалдьыттар АБДь кыттыылаахтара массыынанан хайдах сүүрдэллэрин көрөн, адаптацияламмыт массыына тиһиктэрин куттала суохтарыгар уонна толору үлэлииллэригэр итэҕэйдилэр.
Сиһилии: https://www.sakha.gov.ru/news/65840