Саха сиригэр олоххо киирэр «Лидер култуурунай куода» акселератор бэйэтин таһымынан MBA бырагыраамаларыгар уонна Салайар каадырдары бэлэмниир Бэрэсидьиэн бырагырааматыгар тэҥнээх.
Маннык сыанабылы «Kept» хампаанньа консалтиҥҥа департаменын дириэктэрэ Александр Калугин алтынньы 6 күнүгэр Дьокуускайга буолан ааспыт «Туруктаах буолууттан сыанаҕа диэри» стратегическай сиэссийэҕэ биэрдэ. «Бырагыраама син уһун болдьохтоох уонна интэриэһинэй. Бу бэйэтин таһымынан MBA бырагыраамаларыгар уонна Салайар каадырдары бэлэмниир Бэрэсидьиэн бырагырааматыгар тэҥнэһэр хаачыстыбалаах акселератор буолар», – диэн бэлиэтээтэ Александр Калугин.
Түмсүүгэ тыл этэригэр эпспиэр тэрилтэлэр сыаналарын быһаарыы, инвестицияны тардыы биричиинэлэрин уонна хапытаалы тардар үнүстүрүмүөннэр тустарынан кэпсээтэ. Александр Калугин биисинэс сыанатын быһаарар үс сүрүн төрүөтү бэлиэтээтэ: барыс киириитэ, иэс ноҕурууската уонна инвестордар итэҕэллэрэ. Кини этэринэн, бу хайысхаларынан тиһиктээхтик үлэлээһин тэрилтэлэр үп-харчы өттүнэн туруктаах буолууларын бөҕөргөтөргө уонна кинилэр сайдалларыгар усулуобуйа тэрийэргэ кыах биэрэр.
Александр Калугин биисинэс дьэҥкэ буолуутун үрдэтиигэ туспа болҕомтотун уурда. Наадалаах хардыылар быһыытынан кини ис хонтуруолу сайыннарыыны, корпоративнай процедуралары киллэриини, үп-харчы отчуотун норуоттар икки ардыларынааҕы ирдэбилигэр көһүүнү, ИТ-блогу сайыннарыыны уонна аудит ыытыыны ааттаата.
«Лидер култуурунай куода» акселераторы өрөспүүбүлүкэ Ил Дархана Айсен Николаев көҕүлээбитэ уонна бырагыраама судаарыстыба кыттыылаах саамай бөдөҥ тэрилтэлэри кубулутууга туһаайыллар. 2027 сыл күһүнүгэр диэри суоттаммыт бырайыак экэниэмикэ ыарахаттарын кэмигэр судаарыстыбаннай сектор үп-харчы өттүнэн туруктаах буолуутун уонна капитализациятын үрдэтэр соруктаах.
Сакаасчытынан Саха Өрөспүүбүлүкэтин Баайга-дуолга уонна сир сыһыаннаһыыларыгар министиэристибэтэ буолар. Оператордар уонна толорооччулар — Саха сирин сайдыытын корпорацията, Алмазэргиэнбаан уонна «OneWindow» хампаанньа. Дьарыктанар дьиэни «Биир Ньыгыл Арассыыйа» баартыйа уопсастыбаннай өйөбүлүн Ыстааба биэрдэ. «Kept» — Арассыыйаҕа аудиторскай-консалтинговай өҥөнү оҥорор саамай бөдөҥ хампаанньалартан биирдэстэрэ.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата
Сиһилии: https://www.sakha.gov.ru/news/65751