Саха сиригэр уунан устар туризмы кэҥэтэн, өрүс устун күүлэйдиир саҥа маршруттар сайдаллар.
2026 сылга Өлүөнэ очуостарыгар айаны сэргэ туристарга Сиинэ очуостарыгар, Арктикаҕа, Витим өрүһүнэн ыраах айаннарга уонна эрэгийиэннэр икки ардыларынааҕы маршруттарга ыҥырбыттара.
Бу үлэ Арассыыйа бэрэсидьиэнэ Владимир Путин көҕүлээбит «Туризм уонна ыалдьыттааһын» национальнай бырайыагын сыалларыгар уонна соруктарыгар сөп түбэһэр. Национальнай бырайыак туризм инфраструктуратын сайыннарар, өҥө хаачыстыбатын тупсарар, дойду үрдүнэн айанныыр усулуобуйаны тэрийэр сыаллаах.
Биир саамай сайдан эрэр хайысханан Дьокуускайтан Сиинэ очуостарыгар айан буолар. 2025 сыллаахха боруобалаан көрөн баран, 2026 сыллааҕы уу суолун кэмигэр тоҕус сырыы көрүллүбүтэ. Бу маршрутунан бардахха, Сиинэ өрүс хочотун кэрэ сирдэрин көрөр кыахтанаҕын.
Ону кытта тэҥҥэ Дьокуускай-Өлүөнэ очуостара-Дьокуускай марщрутунан күүлэйдэтэр айаннар салҕаналлар. Бу өрөспүүбүлүкэҕэ өрүс туризмын сүрүн хайысхатыттан биирдэстэрэ буолар. Бырагыраамаҕа Лена өрүһүнэн айан уонна «Өлүөнэ очуостара» айылҕа пааркатыгар сылдьыы киирэллэр.
«Өлүөнэ очуостара чаҕылхай өйдөбүлү хаалларда. Саамай сүрүнэ, биллэн турар, Өлүөнэ очуостара бэйэлэрэ буолаллар. Ханнык да хаартыска, видео бу хайалар кэрэлэрин, улууларын толору биэрэр кыаҕа суох», — диэн турист Светлана санаатын үллэстэр.
Ыраах айаннаах маршруттарга Дьокуускай-Тиксии-Дьокуускай арктическай круиз киирсэр. 2026 сыллаахха икки маннык рейс көрүллүбүт.
Эрэгийиэннэр икки ардыларынааҕы өрүс айана эмиэ кэҥээн иһэр. Айан бырагырааматыгар Дьокуускай уонна Иркутскай уобалас Уус-Кут икки ардынааҕы маршрут баар. Маны таһынан Витим өрүһүнэн эспэдииссийэ хайысхата оҥоһуллан эрэр. Бу саҥа бырагыраамалар уруккуттан баар круизтарга эбии киирэн уонна туристар уу кытыытынааҕы сирдэрдиин билсэллэригэр кыах биэрэллэр.
Хас да күннээх айаннары таһынан, кылгас туристическай бырагыраамалар эмиэ сайдаллар. Дьокуускайтан күнүнэн сылдьар рейстэр, тематическай айаннар, уу уонна сир тырааныспарын туһанар сырыылар бааллар.
Итини сэргэ өрүс тырааныспарын сыыппараҕа киллэрии салҕанар. Өрөспүүбүлүкэҕэ билиэти онлайн-атыылааһын, пассажирдары электроннай регистрациялааһын, сыыппара диспетчеризацията киирэн иһэллэр. Бу систиэмэҕэ өрөспүүбүүлкэ иһигэр үлэлиир суудуналар уонна маршруттар сыыйа холбоноллор.
Саҥа маршруттары оҥоруу өрүс туризмын кэҥэтэр уонна Лена, онтон да атын өрүстэр туристическай кыахтарын туһанар кыаҕы биэрэр.
СӨ Ил Дарханын уонна Бырабыыталыстыбатын пресс-сулууспата.