Пенза куоракка Арассыыйа биэнсийэлээхтэрин XI Спартакиадата салҕанар. 79 эрэгийиэнтэн 730-тан тахса атлет мэтээл иһин күрэхтэһэр, Саха сирин тоҕус киһи көмүскүү сылдьар.
«Биһиги хамаандабыт номнуо хас да тургутууну ааста: ГТО, дартс, харбааһын уонна холбоһуктаах эстафета. Билигин спортсменнарбыт 21-с миэстэттэн 39-ка диэри сылдьаллар – маннык элбэх кыттааччылаах күрэхтэһиигэ бу куһаҕана суох көрдөрүүлээхпит. Александра Тутаева уонна Еремей Куприянов бэйэлэрин көрүҥнэригэр финалга таҕыстылар. Саахымакка Дмитрий Мосорин уонна Наталья Аржакова тэҥ ахсааннаахтык оонньууллар: икки кыайыылаахтар уонна икки хотторуулаахтар. Иннибитигэр өссө икки күн күрэхтэһии күүтэр, онон түмүк миэстэлэр билиҥҥитэ биллибэттэр. Бүгүн сүүрүү, саахымат уонна остуол тенниһэ ыытыллыахтара», — диэн хамаанда салайааччыта Зинаида Афанасьева этэр.
