Саха Өрөспүүбүлүкэтин Уус Маайатааҕы оройуоннай суутун бириигэбэринэн олохтоох киһи РФ Холуобунай кодексатын 222-с ыстатыйатын 1 чааһынан (сэп-сэбиргэли, ботуруону сокуоннайа суох тутуу) буруйдааҕынан билиннэ.
Суут быһаарбытынан, 2019 сыллаахха сууттанааччы өлбүт аймаҕын кыбартыыратыттан нарезной саа 16 ботуруонун ылан баран, бэйэтин дьиэтигэр уура сылдьыбыт. Ол эрээри, «Сэп-сэбиргэл туһунан» (Об оружии) сокуон ирдэбилинэн, киниэхэ сааны уонна ботуруону атыылаһарга эбэтэр тутарга анал көҥүлэ суох эбит.
Суут баллистическай эспэртииһэтин түмүгүнэн, сууттанааччы тута сылдьыбыт ботуруоннара ытарга сөптөөхтөрө бигэргэммит. Холуобунай дьыала матырыйаалларын кытта билсэригэр, сууттанааччы албакаатын баарыгар буруйун билинэн, дьыаланы суутунан силиэстийэтэ суох көрөргө көрдөспүт. Дьыаланы анал бэрээдэгинэн көрүүгэ кини буруйун толору билиннэ уонна оҥорбут быһыытыттан кэмсинэрин эттэ.
Суут, буруйу чэпчэтэр биричиинэлэри учуоттаан, кини көҥүлүн 10 ыйга хааччахтаата. Буруйдаммыт киһигэ анал судаарыстыбаннай уорган көҥүлэ суох муниципальнай тэриллии сириттэн тахсара, олорор уонна үлэлиир сирин уларытара бобуллар. Суут бириигэбэрэ сокуоннай күүһүгэр киирэ илик, уонна киниэхэ үҥсүү түһэриллиэн сөп. Бу туһуна Саха Өрөспүүбүлүкэтин сууттарын холбоһуктаах пресс-сулууспата иһитиннэрэр.