Саха Өрөспүүбүлүкэтин Ил Дархана Айсен Николаев дьаһалынан Арассыыйа Федерациятын Дьоруойа Алексей Петровы тиһэх суолугар атаарары тэрийэр бырабыытылыстыба хамыыһыйата тэрилиннэ. Бу туһунан ТАСС ааҕыныстыбаҕа Ил Дархан уонна Бырабыытылыстыба Дьаһалтатын салайааччыта, хамыыһыйа бэрэссэдээтэлэ Георгий Михайлов иһитиннэрдэ.
«Саха Өрөспүүбүлүкэтин Ил Дархана Айсен Николаев быһаарыытынан Арассыыйа Федерациятын Дьоруойа Алексей Рафаэлович Петровы тиһэх суолугар атаарарга анаммыт бырабыытылыстыба хамыыһыйата тэрилиннэ. Хамыыһыйа састаабыгар Ил Дархан уонна Бырабыытылыстыба Дьаһалтатын, тустаах министиэристибэлэр уонна биэдэмистибэлэр, быраабы араҥаччылыыр уорганнар, байыаннай комиссариат бэрэстэбиитэллэрэ киирдилэр. Хамыыһыйа сүрүн соруга — Арассыыйа Дьоруойун тиһэх суолугар атаарыы сиэрин-туомун судаарыстыба үрдүк таһымыгар тэрийии, кини хорсун быһыытыгар дириҥ ытыктабылы көрдөрүү уонна дьонугар-сэргэтигэр, аймахтарыгар бары өттүнэн көмөнү оҥоруу буолар», — диэн эттэ Георгий Михайлов.
Дьоруойдуун быраһаайдаһыы Дьокуускай куоракка, Үөһээ Бүлүүгэ уонна кини төрөөбүт нэһилиэгэр ыытыллара былааннанар. «Бастакы былаанынан, Алексей Рафаэловиһы муус устар 28 күнүгэр Дьокуускайга, муус устар 29 күнүгэр Үөһээ Бүлүүгэ, оттон муус устар 30 күнүгэр төрөөбүт Маҥаас нэһилиэгэр тиһэх суолугар атаарыахтара. Тэрийэр боппуруостары дьиэ кэргэнин уонна муниципальнай былаастары кытта чопчулаһан баран, сиэрин-туомун ыытар чопчу кэми уонна сири эбии иһитиннэриэхпит», — диэтэ Михайлов.
Санаттахха, муус устар 25 күнүгэр Саха сирин Ил Дархана байыаннай сулууспалаах олохтон туораабытын туһунан иһитиннэрбитэ. Арассыыйа Бэрэсидьиэнэ Владимир Путин ыйааҕынан байыаннай иэһин толорууга көрдөрбүт муҥура суох хорсун быһыытын иһин Алексей Петровка Арассыыйа Дьоруойун аата иҥэриллибитэ. Кини уонунан штурмаларга кыттыбыта уонна 8 хонук тухары төгүрүктээһиҥҥэ соҕотоҕун хаалан тыыннаах тахсыбыта.