Айсен Николаев уонна Умар Кремлев Саха сиригэр «Вызов Севера» боксаҕа аан дойдутааҕы турнир саҕаламмытын биллэрдилэр.
Атырдьах ыйын 30 күнүгэр СӨ Ил Дархана Айсен Николаев уонна аан дойдутааҕы бокса ассоциациятын (IBA) бэрэсидьиэнэ Умар Кремлев «Триумф» уораҕайыгар «Вызов Севера» профессиональнай бокса киэһэтин арыйдылар.
Турнирга Арассыыйаттан, Ирантан, Мексикаттан уонна Конготтан 12 боксер кыттар.
Айсен Николаев аан дойду таһымнаах бокса Саха сиригэр буоларын тоһоҕолоон бэлиэтээтэ.
—Биһиги Саха сиригэр бокса аан дойдутааҕы ассоциациятын өйөбүлүнэн норуоттар икки ардыларынааҕы кылаастаах күрэхтэһиилэри ыытары былааннаабыппыт ыраатта. Онтон бүгүн биһиги бастакы холбоһуктаах турнирбыт саҕаламмытын биллэрдибит уонна бу маннык күрэхтэһиилэр тиһиктээхтик ыытыллалларыгар эрэнэбин, — диэтэ Ил Дархан.
Ил Дархан итини сэргэ Умар Кремлевка оҕо успуордун уонна бокса бэтэрээннэрин тиһиктээх өйөбүлүгэр махтанна.
—Бэтэрээннэрбитигэр болҕомтотун иһин ураты махталбын тиэрдиэхпин баҕарабын: бүгүн Умар Назарович кинилэргэ 1 мөл.солк. сэртипикээти туттарда. Маннык үрдүк таһымнаах спортивнай тэрээһиннэр киин куораппытын киэргэтэллэрин таһынан, успуорт сайдыытыгар сирдииллэр, — диэн Айсен Николаев бэлиэтээтэ.
IBA бэрэсидьиэнэ, бастатан туран, Арассыыйаҕа успуорду сайыннарыыга Саха сирин кылаатын уонна успуорт көҕүлээһиннэрин өйөөһүҥҥэ өрөспүүбүлүкэ салалтатын көхтөөх үлэтин үрдүктүк сыаналаата.
Саха сиригэр бокса успуорт биир саамай маассабай көрүҥэ буолар. Саха сиригэр 103 успуорт көрүҥэ күүскэ сайдар, 64 федерация аккредитацияланан физкултуураны сайыннарыыга үлэлииллэр. Кэлиҥҥи икки сылга боксанан дьарыктанааччылар ахсааннара 12% эбиллэн, 7500 кэриҥэ киһи буолла.
«Вызов Севера» турнир Саха сиригэр 2023 сылтан тиһиктээхтик ыытыллар. Тэрээһин РФ Бэрэсидьиэнэ Владимир Путин көҕүлээбит «Спорт России» федеральнай бырагырааматын соруктарыгар эппиэттиир. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.
Сиһилии: https://www.sakha.gov.ru/news/60998