Алексей Еремеев салайааччылаах сэттис ыҥырыылаах Саха Өрөспүүбүлүкэтин Ил Түмэнин XVII (уочараттаах) пленарнай мунньаҕар норуот дьокутааттара «Саха Өрөспүүбүлүкэтигэр босхо юридическай көмө туһунан» СӨ сокуонун 5 уонна 8 ыстатыйаларыгар уларытыылары киллэрэр туһунан өрөспүүбүлүкэ сокуонун иккис ааҕыыга ылыннылар. Бу сокуону норуот дьокутаата Афанасий Владимиров көҕүлээн киллэрбитэ.
Сокуонунан 18-тан 23-гэр диэри саастаах, үөрэх тэрилтэлэригэр үөрэнэр кэмнэригэр икки төрөппүттэрэ эбэтэр соҕотох төрөппүттэрэ өлбүт дьоҥҥо босхо юридическай көмөнү ылар быраап бэриллэр.
Ити этиллибит дьон икки төрөппүттэрэ эбэтэр соҕотох төрөппүттэрэ өлбүтүнэн сибээстээн нэһилиэстибэ быраабын олоххо киллэриигэ уонна көмүскүүргэ, ону тэҥэ судаарыстыбаннай өйөбүл миэрэлэрин хааччыйыыга сыһыаннаах боппуруостарынан быһаарсар буоллахтарына, босхо юридическай көмөнү ылар бырааптаахтар.
Бу дьон тылынан уонна суругунан босхо быраап өттүнэн сүбэ-ама ыларга, ону тэҥэ суукка кинилэр интэриэстэрин көмүскүүргэ быраабы ылаллар. Сокуон бүтэһиктээх ааҕыыга ылылынна.