Дьокуускайга «Триумф» киинигэр муус устар 6–10 күннэригэр Олимпийскай чөмпүйүөн Павел Пинигин чиэһигэр уонна «Саха сирин тимир суоллара» хампаанньа бирииһигэр үгэс буолбут турнир ыытыллыаҕа.
Күрэхтэһиигэ 1140-тан тахса кыттааччы мустуоҕа. Павел Пинигин чиэһигэр үс таһымнаах күрэхтэһиилэри ыытар былааннанар.
Өрөспүүбүлүкэтээҕи аһаҕас күрэхтэһиигэ 2013 сыллаахха төрөөбүт уонна онтон балыс саастаах күрэсчиттэр күөн көрсүөхтэрэ. Бүтүн Арассыыйатааҕы күрэхтэһиигэ 16 саастарыгар диэри уолаттар тустуохтара. Оттон норуоттар икки ардыларынааҕы турнир 18 саастарыгар диэри кыттааччылары түмүөҕэ.
«Биһиги бу үс күрэхтэһиигэ барыта рекорд буолар 1140 кыттааччыны күүтэбит. Норуоттар икки ардыларынааҕы турнирга Монголияттан, Казахстантан, Таджикистантан, Кыргызстантан уонна Беларусьтан тустууктар кыттыахтара. Ону тэҥэ Арассыыйа элбэх эрэгийиэннэриттэн хамаандалар кэлиэхтэрэ», — диэн ЯСИА-ҕа Павел Пинигин кэпсээтэ.
Улахан тэрээһин саха тустууктара Монреаллааҕы Олимпийскай оонньууларга кыайбыттарыгар-хоппуттарыгар 50 сылыгар ананыаҕа. Оччолорго Павел Пинигин кыһыл көмүһү ылбыта, оттон Роман Дмитриев уонна Александр Иванов үрүҥ көмүс призердарынан буолбуттара.
Бэлиэ күҥҥэ анаан тустуу биэс көбүөргэ ыытыллыаҕа. Кыайыылаахтарга уонна призердарга спонсордартан анал бириистэр олохтоннуллар.