Саха сирин байыастарын эбии тиэхиньикэнэн уонна гуманитарнай көмөнөн хааччыйыы үлэтэ салҕанар. Сарсын өрөспүүбүлүкэттэн өссө үс тиэхиньикэни ыытыахтара. Бу туһунан «Кыайыыга бииргэ» өрөспүүбүлүкэтээҕи хамыыһыйа Координационнай киинин салайааччыта Георгий Куркутов брифинг кэмигэр иһитиннэрдэ.
«Сарсын өссө биир улахан уйуктаах массыына үс тиэхиньикэлээх айанныаҕа. Алдан уонна Нерюнгри оройуоннарыттан айан суолун устатыгар гуманитарнай көмөнү тиэйии тэриллиэҕэ», — диэтэ Георгий Куркутов.
Кини этэринэн, Аллараа Бэстээххэ Мэҥэ Хаҥалас улууһун дьаһалтата биэрбит баазата логистика үлэтин биир сүрүн элэмиэнинэн буолла. Бу былаһаакка тиэхиньикэлэри уонна гуманитарнай таһаҕаһы байыаннай дьайыы зонатыгар ыытыах иннинэ мунньарга көмөлөһөр.
«Бу бааза көмөтүнэн үлэбит көдьүүһүн биллэрдик үрдэттибит. Бүгүн Аллараа Бэстээх пуунуттан номнуо 10-тан тахса тиэхиньикэ ыытылынна, бу хайысханан үлэ салҕанар», — диэн Координационнай киин салайааччыта бэлиэтиир.
Сыл саҕаланыаҕыттан Саха сириттэн байыаннай дьайыы зонатыгар 75-тэн тахса тиэхиньикэ уонна 160-тан тахса тонна гуманитарнай таһаҕас ыытылынна. Таһаҕас састаабыгар аадырыстаах баһыылкалар, тэриллэр, эбии таҥас-сап уонна өрөспүүбүлүкэтээҕи волонтерскай тэрилтэлэр оҥорбут оҥоһуктара киирэллэр.
Георгий Куркутов волонтерскай уонна уопсастыбаннай холбоһуктарга махталын биллэрдэ.
«Биһиэхэ улахан өйөбүлү көхтөөх бөлөхтөр уонна волонтердар оҥороллор. Кинилэр таҥас-сап тигиинэн, маскировочнай сиэккэлэри оҥоруунан уонна да атын наадалаах бородууксуйаларынан дьарыктаналлар. Байыаннай дьайыы зонатыттан киирэр сайаапкалары барытын түргэнник толорорго кыһаллабыт», — диэтэ кини.
Маны таһынан, Саха сиригэр волонтерскай холбоһуктары өйөөһүҥҥэ иистэнэр массыыналары хомуйуу саҕаланна. Бу иистэнэр массыыналар ахсааннара элбиирин түмүгэр, байыаннайдарга наадалаах икки хайысхалаах бородууксуйаны оҥоруу улаатыа диэн күүтэллэр.
Бу туһунан Саха Өрөспүүбүлүкэтин Ил Дарханын уонна Бырабыыталыстыбатын дьаһалтатын пресс-сулууспата иһитиннэрэр.