Балаҕан ыйын 1 күнүттэн Арассыыйа оскуолаларыгар 9–10 кылаас үөрэнээччилэрэ обществознание саҥа учебниктарынан үөрэниэхтэрэ. Бу туһунан «Известия» таһаарыыга Арассыыйа Бэрэсидьиэнин гуманитарнай эйгэҕэ судаарыстыбаннай бэлиитикэтин управлениетын референа, история уонна обществознание биир кэлим учебниктарыгар эппиэттээх сэкирэтээр Владислав Кононов иһитиннэрбит.
Кононов этэринэн, быйыл 11 кылаастар урукку кууруһунан үөрэниэхтэрэ, оттон кинилэргэ саҥа учебниктары 2027 сыл балаҕан ыйын 1 күнүттэн киллэриэхтэрэ.
Санатан суруйдахха, Арассыыйа Үөрэҕириигэ министиэристибэтэ историческай сырдатыы концепциятын бигэргэппитэ. Бу докумуон уһуйааннартан, оскуолалартан, колледжтартан уонна үрдүк үөрэх кыһаларыттан саҕалаан, ыччакка уопсастыба гражданскай биир сомоҕо буолуутун иитии сүрүн механизмнарын быһаарар.