Ленскэй оройуонуттан анал байыаннай дьайыы бэтэрээнэ Игорь Ионов «СВОё дело | 14» бырагыраама чэрчитинэн социальнай хантараак түһэристэ. Бу көмөтүнэн кини урбаанньыт быһыытынан регистрацияланан, дьиэ тутуунан дьарыктанар бэйэ дьыалатын тэрийдэ. «Мой бизнес» Ленскэйдээҕи киин буойуттарга урбаан эйгэтигэр бастакы хардыыларыттан саҕалаан, бэйэ дьыалатын арыналларыгар бары өттүнэн өйөбүлү оҥорор. Бу туһунан «Ленский вестник» хаһыат суруйар.
Игорь Владимирович Ленскэйдээҕи нэһилиэнньэни социальнай харысхаллааһын управлениетыгар, Биэнсийэ уонна социальнай страховкалааһын пуондатын салаатыгар, «Бизнес-инкубатор» МКУ-га, «Мой бизнес» кииҥҥэ, ону тэҥэ оройуон олохтоохторугар: Арцрун Аргипсовичка, Сергей Фирсевка, Людмила Овчинниковаҕа, Николай Полютовка уонна Иннокентий митрополит аатынан храм үлэһиттэригэр махталын биллэрэр.
Кини кэпсээбитинэн, төрөөбүт дойдутугар төннөн баран, тугунан да дьарыктаммакка сылдьар кыаҕа суоҕун өйдөөбүт. Сөптөөх үлэни булбакка, бэйэтин дьыалатын арынарга санаммыт.
«Мин нэһилиэнньэни үлэнэн хааччыйыы эйгэтигэр көрүллэр социальнай өйөбүл миэрэлэрин туһунан биллим уонна бэйэ дьыалатын арынарга быһаарынным. Биир сүрүн усулуобуйа — көрүллүбүт үбү-харчыны туох да иэһэ-күүһэ суох сэп-сэбиргэл эрэ ыларга туттуохтааххын. Социальнай хантараагы күүтүү бириэмэтэ уһуна суох. Мин бу хардыым олохпун чахчы үчүгэй өттүгэр уларытыа уонна урбааҥҥа саҥа кыахтары арыйыа диэн эрэнэбин», — диэн Игорь Ионов бэлиэтиир.
Игорь Ионов тутуу бары көрүҥүнэн дьарыктанар. Кини дьиэни тутууну акылаатыттан саҕалаан, сарайыгар тиийэ барытын оҥорорго бэлэм. Кини дьиэни тутууттан саҕалаан кырааскалааһын, өстүөкүлэни туруоруу, муоста тэлгээһин, истиэнэлэри бүрүйүү, штукатурка, таҥыы үлэлэрэ, санитарнай-техническэй үлэлэр, ититии уонна салгын ситимнэрин туруоруу, электромонтажтааһын уо.д.а үлэтин барытын оҥорор. Ону таһынан, кини тутуу былаһааккатын бэлэмниир, дьиэлэри көтүрэр уонна суох оҥорор, инженернэй тутуулары, коммунальнай эбийиэктэри уонна массыына суолларын тутар.
Игорь Ионов бойобуой сорудахтары толорууга «За отвагу», «За воинскую доблесть» II степени, «За боевые отличия», «За участие в СВО в составе 155-й отдельной бригады морской пехоты» мэтээллэринэн наҕараадаламмыта. Владивосток госпиталыгар Аҕа дойду Улуу сэриитин дьоруойдарыгар анаммыт пааматынньыгы чөлүгэр түһэриигэ кыттыбытын иһин Бочуотунай грамотанан наҕараадаламмыта. Бу пааматынньыгы чөлүгэр түһэриигэ Ньүүйэттэн төрүттээх Сергей Гогенфельд эмиэ кыттыыны ылбыта.
Бу холобур Арассыыйа үрдүнэн байыаннай дьайыы бэтэрээннэрэ урбаанынан дьарыктаналларыгар көрүллэр социальнай хантараактар көдьүүстэрин көрдөрөр. 2025 сыл түмүгүнэн 200-тэн тахса бэтэрээн маннык көмөнөн бэйэ дьыалатын арыйда. Маннык өйөбүллэр кинилэр идэлэрин сөргүтэллэригэр уонна олохторун таһымын үрдэтэллэригэр төһүү күүс буолаллар.