Саха сиригэр байыаннай дьайыы кыттыылаахтарыгар анаан таҥас тигиитигэр ыытыллар «Илии сылааһа» VI өрөспүүбүлүкэтээҕи күрэс бу өрөбүллэргэ түмүгүн таһаарда. Бу улахан тэрээһиҥҥэ Кэбээйи улууһуттан «Надежный тыл» иис сыаҕын хамаандата үрдүк таһымнаахтык кыттан, муҥутуур кыайыылаах үрдүк аатын ылла.
«Надежный тыл» хамаанда салайааччыта –Кландра Терехова. Кинилэр 2023 сыл балаҕан ыйын 2 күнүттэн Ирина Саввина салайар «Илии сылааһа» иис сыаҕар филиал быһыытынан үлэлэрин саҕалаабыттара. Хамаанда бэйэтин иистэнньэҥнэринэн, сатабылларынан уонна эппиэтинэстээхтэринэн биллэр.
Күрэскэ ситиһиилээхтик кыттыыга хас биирдии киһи сырата улахан оруоллаах. Закройщица Венера Лугинова уонна хаачыстыбаны хонтуруоллуур тутаах киһи Екатерина Левина, ону тэҥэ иистэнньэҥнэр Саргылана Докторова, Саргылана Павлова, Зинаида Лугинова, Светлана Обутова, Александра Сметанина, Февронья Максимова, Туяра Дьячковская сыралаах үлэлэринэн кыайыыны ситистилэр. Манна кыттыы, бастатан туран, улахан уопут уонна байыаннай дьайыыга сылдьар байыастарга көмө буолар.
Маны таһынан, тигиллибит таҥастары тиэйиигэ-таһыыга волонтер суоппар Михаил Данилов, ону тэҥэ күрэс устатын тухары сылаас аһынан хааччыйбыт асчыттар Екатерина Захарова, Дмитрий Харлампьев уонна Валентина Кушнарева күүс-көмө буоллулар. Кинилэргэ хамаанда аатыттан барҕа махтал тыллара ананнылар.
«Бу хамаандаҕа саамай эдэрдэрэ буоларым быһыытынан, иистэнньэҥ кыргыттартан олус элбэҕи биллим, сатыыр буоллум, иис албастарын иҥэринним. «Надежный тыл» хамаанда бу ситиһиитэ – хас биирдиибит сыралаах үлэтинэн, биир санаанан салайтаран түмсүүлээхтик үлэлээбиппит түмүгэр кэллэ», — диэн эдэр иистэнньэҥ Туяра Дьячковская санаатын үллэстэр.
Cанатан эттэххэ, быйыл Саха сиригэр ыам ыйын 28 күнүттэн бэс ыйын 8 күнүгэр диэри «Илии сылааһа-2026» VI өрөспүүбүлүкэтээҕи күрэс ыытылынна. Өрөспүүбүлүкэ үрдүнэн дьахталлар байыаннай дьайыы кыттыылаахтарыгар таҥас кэмпилиэгин тигиигэ күрэхтэстилэр. Күрэс сүрүн соруга – байыастары өйөөһүн уонна волонтерскай хамсааһыны сайыннарыы. Онно Саха сирин муниципалитеттарыгар уонна куорат уокуруктарыгар тэриллибит иистэнньэҥнэр хамаандалара кытыннылар. Уопсайа Саха сирин араас улуустарыттан 9 хамаанда күрэхтэстэ. Кинилэр 14 араас суол таҥаһы: көстүүм, тактическай ырбаахы уонна ыстаан, ардахха кэтэр былаас, флис толстовка, футболка, балаклава уо.д.а. тиктилэр.