Самара куоракка араагы эмтиир саҥа эми оҥорон таһаарыахтара. Манна сөптөөх лиссиэнсийэни олохтоох мэдиссиинискэй университет ылла. Арассыыйаҕа оҥоһуллубут, мэдиссиинэҕэ улахан сайдыыны аҕалар инновационнай ньыманан буолар. Учуонайдар киһи иммуннай килиэккэлэрин куһаҕан искэни бэйэлэрэ булан суох гыналларын курдук уларытан оҥороллор.
Самара медуниверситетын (СамГМУ) научнай үлэҕэ проректора, мэдиссиинэ наукатын доктора, бэрэпиэссэр Игорь Давыдкин маннык кэпсиир:
«Биһиги киһи иммуннай тиһигин килиэккэлэрин, чуолаан Т-лимфоциттары, уларытар анал генно-инженернэй эми оҥорон таһаарабыт. Генетика өттүнэн саҥардабыт. Ол түмүгэр кинилэргэ искэн килиэккэлэригэр сөп түбэһэр рецептордар үөскүүллэр. Онон куһаҕан килиэккэлэр киһи этигэр-хааныгар ханна да саспыттарын үрдүнэн, булан суох гыналлар. Уларытыллыбыт килиэккэлэр киһиэхэ биир ый, эбэтэр биир-икки сыл устата баар буолуохтарын сөп».
Инфекция киирбэтин диэн, эмтэнэр кэмҥэ ыарыһаҕы туспа боксаҕа сытыараллар. Ыарыһах хаанын лабораторияҕа ыытан, онно үтүөрэригэр наадалаах килиэккэлэри үүннэрэн таһаараллар. Эми хас биирдии киһиэхэ анаан тус-туспа оҥороллор. Иммуннай тиһик үлэлээн барарын туһугар биир эрэ капельницаны туруоруу ирдэнэр.
Бу саҥа ньыманан Арассыыйа ханнык баҕарар эрэгийиэнин олохтооҕо ОМС полиһынан босхо эмтэниэн сөп. Үрдүк технологиялаах көмөҕө киирэр, онон судаарыстыбаттан анал кубуота көрүллэр. Самара университетын килииньикэлэригэр сылга 100-тэн 200-кэ диэри киһи маннык эмтэниини барыан сөп диэн бэлиэтииллэр.