Саха сирин олохтоохторун чэпчэтиилээх эминэн хааччыйыыга быйыл 4,6 млрд солкуобай көрүлүннэ, онтон 3,8 млрд солкуобайа — өрөспүүбүлүкэ бүддьүөтүттэн. Бу суума былырыыҥҥытааҕар икки төгүл элбэх (1,9 млрд солкуобай).
Чэпчэтиилээх эминэн хааччыйыы үлэтэ дойду бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыак уонна «Биир ньыгыл Арассыыйа» баартыйа «Здоровое будущее» бырайыагын чэрчилэринэн ыытыллар.
«Чэпчэтиилээх ырысыабы оҥотторуу түргэн уонна улахан кумааҕыта суох ааһар. Эмп сыаната үрдүк, ону ыларга бу улахан көмө. Махтанабын бырааспар уонна сиэстэрэбэр түргэнник докумуоннары оҥорбуттарыгар», — диэн махталын биллэрдэ Мииринэй куорат олохтооҕо Лариса Михеева.
Саха сиригэр чэпчэтиилээх эминэн хааччыйыы саҥа хамсааһына киирдэ. Билигин «Сахафармация» АО уонна «Саха Өрөспүүбүлүкэтин Доруобуйа харыстабылын министиэристибэтин Ресурснай киинэ» ГКУ кыттыгас эмтэри уонна мэдиссиинискэй оҥоһуулары атыылаһаллар.
Госдуума дьокутаата Галина Данчикова эппитинэн, дьоҥҥо чэпчэтиилээх эми биэрии — доруобуйа харыстабылын биир саамай улахан суолталаах боппуруостара.
Саха сиригэр босхо эминэн хааччыйыы салҕанар. Холобур, быйыл 40 мөлүйүөн солкуобай сүрэх-тымыр ыарыылаахтарга (инфаркт, инсульт, сүрэххэ эпэрээссийэлэммиттэргэ) ананар.
«Инфаркт эбэтэр инсульт кэнниттэн балыыһаттан тахсыбыт пациеннар үрдүк кутталлаах бөлөххө киирэллэр. Биһиги бырагыраамабытынан амбулаторияҕа эмтэнии хатыланан ыалдьыы кутталын биллэ намтатар», — диэн бэлиэтиир доруобуйа харыстабылын миниистирэ Лена Афанасьева.