Арассыыйа Үрдүкү суута «Яблоко» баартыйаны Судаарыстыбаннай Дуума быыбарыттан уһулар туһунан быһаарыыны бүтэһиктээхтик бигэргэттэ. Маныаха Арассыыйа Киин быыбардыыр хамыыһыйата атырдьах ыйын 18 күнүгэр быыбар бүлүтүөнүгэр уларытыылары киллэриэҕэ. Бу туһунан «Российская газета» суруйар.
Апелляционнай коллегия бастакы инстанция суутун уурааҕын уларыппатах. Онон Киин быыбардыыр хамыыһыйа (ЦИК) бүгүн мунньах ыытан, тохсус ыҥырыылаах Судаарыстыбаннай Дуума дьокутааттарын быыбарыгар федеральнай уокурук бүлүтүөнүн тиэкиһин чочуйуоҕа.
Санаттахха, атырдьах ыйын 10 күнүгэр ЦИК 11 бэлитиичэскэй баартыйалаах бүлүтүөнү бигэргэппитэ. Билигин «Яблоко» уһулуллубутунан, бүлүтүөҥҥэ 10 эрэ баартыйа хаалар. Ол эрээри, сокуон ирдэбилинэн, сэрэбиэйинэн тахсыбыт нүөмэрдэр уларыйбаттар. Ол аата, бүлүтүөҥҥэ 1 № баартыйа («Биир ньыгыл Арассыыйа») кэнниттэн тутатына 3№ баартыйа (ЛДПР) суруллуоҕа (2№ «Яблоко» миэстэтэ кураанах хаалар).
Тоҕо туораттылар?
Баартыйаны регистрацияттан уһуларга сүрүн төрүөтүнэн — быыбар иннинээҕи аҕыйтаассыйа үлэтигэр сокуону кэһиилэр тахсыбыттар. Чуолаан, суут бэлиэтииринэн, ааптардар бырааптарын көҥүлэ суох туһаммыттара биллибит. Итини таһынан, баартыйа пуондатыгар омук дойдуларыттан үбүлэнэр дьонтон харчы киирбит диэн Росфинмониторинг дааннайдара дьыалаҕа сыһыарыллыбыттар. Үрдүкү суут мунньаҕар Генеральнай борокуратуурата уонна ЦИК бэрэстэбиитэллэрэ «Яблоконы» туоратар уурааҕы сокуоннайынан билинэн, толору өйөөтүлэр.