Дьокуускай куорат олохтооҕо тохтобулга утуйа сытар киһиттэн төлөпүөнүн уонна баанын каартатын ылан, онтун бэйэтин наадатыгар туһаммытын иһин сууттаныан сөп.
Дьокуускайдааҕы полиция 1-кы №-дээх отделын дьуһуурунай чааһыгар биир эр киһи төлөпүөнүн уонна каартатыттан харчытын уордарбытын туһунан сайабылыанньалаах кэлбит. Кини этэринэн, арыгы иһэн баран оптуобус тохтобулугар утуйан хаалбыт. Уһуктан баран көрбүтэ – төлөпүөнэ да, баанын каартата да суох буолбут. Оттон сотору буолан баран каартатыттан харчы уһуллубутун билбит. Көрдүүр тэрээһиннэр түмүктэригэр полиция үлэһиттэрэ уорбаланааччыны – 38 саастаах куорат олохтооҕун быһаардылар.
Дьыаланы силиэстийэлээһин кэмигэр дьахтар быһаарбытынан, кини төлөпүөнү тохтобул таһыгар от быыһыттан булан бэйэтигэр ылбыт. Кэлин төлөпүөнүн кытта баан каартата баарын көрөн, маҕаһыынтан 3 500 солкуобайга ас-үөл атыыласпыт. Онтон сотору кэминэн өссө харчы наада буолан, булуллубут төлөпүөнүн 2 000 солкуобайга туттарбыт.
Билигин полиция үлэһиттэрэ дьахтар тылын кырдьыгын бэрэбиэркэлииллэр. Төлөпүөнү уонна каартаны кини хайдах илэ бэйэтэ ылбыта чуолкайданар. РФ Холуобунай кодексатын 158-с ыстатыйатын («Уоруу») 2-с уонна 3-с чаастарынан холуобунай дьыалалар тэрилиннилэр.