Тыа хаһаайыстыбатын үлэһиттэрэ 889 туоннаттан тахса уматыгы ыллылар. Өрөспүүбүлүкэҕэ сүөһү аһылыгын бэлэмнээһин хампаанньатын хааччыйарга тыа сирин бородууксуйатын оҥорон таһаарааччыларга анал таараҕа биэрии бэрээдэгэ бигэргэтилиннэ.
Тыа хаһаайыстыбатын уонна ас-үөл бэлиитикэтин министиэристибэтин чахчытынан, өрөспүүбүлүкэ хаһаайыстыбалара 827,4 туонна дизтопливо уонна 62,2 туонна бэнсиини ыллылар. От ыйыгар уонна атырдьах ыйдарыгар 1 579,9 туонна дизтопливоны уонна 290,6 туонна бэнсиини тириэрдии уопсай кээмэйэ олохтоммута.
Уматыгынан хааччыйыы боппуруостарын Тыа хаһаайыстыбатын министиэристибэтин суһал ыстааба хонтуруолга ылла. Күн аайы улуустар баһылыктарын уонна тыа хаһаайыстыбатын управлениеларын салайааччыларын кытары мунньах ыытыллар, сүөһү аһылыгын бэлэмниир хампаанньа үлэтин хаамыытын дьүүллэһэллэр.
Атырдьах ыйын 25 күнүнээҕи туругунан, өрөспүүбүлүкэҕэ 269 023 гектар ходуһа охсулунна. 281 579 туонна от (былаантан 66%), 7 517 туонна сиилэс уонна 1 732 туонна сенаж бэлэмнэннэ.
Хаһаайыстыбалары наадалааҕынан хааччыйыы уонна хампаанньа үлэтин сүрүннээһин салҕанар.
СӨ Ил Дарханын уонна бырабыыталыстыбатын пресс-сулууспата