Бүгүн, балаҕан ыйын 13 күнүгэр, Саха сирин биллиилээх судаарыстыбаннай уонна бэлитиичэскэй диэйэтэлэ Степан Николаевич Платонов төрөөбүтэ 100 сылын туолар.
Кини Үөһээ Бүлүү улууһун Туобуйа нэһилиэгэр Николай Андреевич Платонов уонна Анна Ивановна Тарасова дьиэ кэргэнигэр төрөөбүтэ.
Степан Николаевич 1970-с сылларга өрөспүүбүлүкэ сайдыытыгар сүҥкэн оруолу ылбыта. Кини үлэтин-хамнаһын эрдэ саҕалаабыта: сэттэ кылааһы бүтэрэн баран, 1942 сыллаахха, Аҕа дойду Улуу сэриитин кэмигэр, 16 эрэ саастааҕар биригэдьииринэн ананан, салайар дьоҕурун эрдэ көрдөрбүт. 1943 сыллаахха колхуос бэрэссэдээтэлинэн талыллыбыта, онтон 1944 сыллаахха аармыйаҕа ыҥырыллыбыта. Сэрии кэнниттэн дойдутугар төннөн, салгыы колхуоһу салайбыта, хаһаайыстыба сайдыытыгар улахан ситиһиилэммиттэрэ.
1950 сыллаахха Степан Николаевич Карл Маркс аатынан колхуоһу салайарга ананар. Кини салалтатынан колхуос хаалыыттан тахсан, өрөспүүбүлүкэ биир бастыҥ үлэлээх хаһаайыстыбатыгар кубулуйбута. 1958 сыллаахха Нам, Ороһу уонна Харбалаах колхуостара холбоһоннор, Исидор Барахов аатынан сопхуос тэриллибитигэр Степан Николаевич сопхуос дириэктэринэн анаммыта. Кини көҕүлээһининэн Ороһу-Ньэгэдэк нүөлсүтүү ньыматынан ирригационнай систиэмэ тутуллубута, бу систиэмэ өрөспүүбүлүкэҕэ биир бастыҥынан билиниллибитэ.
1960 сыллаахха Степан Николаевич Новосибирскайга үрдүкү партийнай оскуолаҕа үөрэнэн баран, Саха АССР тыатын хаһаайыстыбатын салайар араас дуоһунастарга үлэлээн, Ленскэй оройуон тыатын хаһаайыстыбатын управлениетын начаалынньыгынан, Нам оройуонун баартыйатын бастакы сэкирэтээринэн, СӨ тыатын хаһаайыстыбатын бородууксуйатын хомуйууга судаарыстыбаннай иниспиэксийэтин начаалынньыгынан, онтон 1970-с сылларга Саха АССР Миниистирдэрин Сэбиэтин бэрэссэдээтэлин бастакы солбуйааччытынан таһаарыылаахтык үлэлээбитэ.
Кини үлэтин иһин Үлэ Кыһыл Знамята уордьанынан, «Бочуот Знага» икки уордьанынан, элбэх мэтээлинэн наҕараадаламмыта. Хаста даҕаны Саха АССР Үрдүкү Сэбиэтин дьокутаатынан талыллыбыта, обком бюротун чилиэнинэн, өрөспүүбүлүкэтин туһугар бигэтик үлэлээн-хамсаан ааспыта.
Быйыл Степан Николаевич Платонов төрөөбүт дойдутугар да, өрөспүүбүлүкэҕэ даҕаны элбэх тэрээһин ыытылынна. Кини туһунан кинигэ бэлэмнэнэ сылдьар.
Степан Платонов олоҕун суола — төрөөбүт дойдуга сулууспалааһын холобура. Холкуос боростуой үлэһититтэн саҕалаан, өрөспүүбүлүкэ сайдыытын быһаарар салайааччыга тиийэ үүнэн, кини Саха сирин устуоруйатыгар улахан суолу хаалларбыта.
Киһи кинини ахта-саныы сырыттаҕына эрэ тыыннаах. Кини сырдык дууһата, дьоҥҥо оҥорбут үтүөтэ үйэлэргэ хаалар уонна бу история көлүөнэттэн көлүөнэҕэ бэриллэ турдаҕына, сүдү киһи аата өлбөт-сүппэт аналлаах.
Үтүө, үлэһит киһи аата үйэлэргэ ааттаныа.