Бүгүн Дьокуускайга ДОСААФ дьиэтигэр хамсааһын төрүттэммитэ 4 сылыгар аналлаах үөрүүлээх тэрээһин буолан ааста.
Бу кэм устата анал байыаннай дьайыы саҕаланыыта төрүттэммит көҕүлээһин, өрөспүүбүлүкэ биир саамай далааһыннаах уонна систиэмэлээх баҕа өттүнэн үлэлиир холбоһугар кубулуйда.
Хамсааһын анал байыаннай дьайыы саҕаланыаҕыттан Саха сириттэн ыҥырыллыбыт байыастарга араас өрүттээх көмөнү оҥорор соруктаах тэриллибитэ. Билигин бу сүүһүнэн дьону түмэр ситим. Хамсааһын салайааччыта Анна Ефимова эппитинэн, бу сыллар тухары үтүмэн үлэ, көмө оҥоһуллубут.
Үөрүүлээх күн тэрээһинэ сылаас, истиҥ тыыннаахтык ааста. Көрсүһүүгэ активистар, волонтердар, былаас, урбаан уонна да атын тэрилтэлэр бэрэстэбиитэллэрэ муһуннулар.
Чиэстээһин сиэригэр-туомугар ордук көхтөөх волонтердарга өрөспүүбүлүкэ салалтатын аатыттан махтал суруктар уонна өйдөбүнньүк бэлиэлэр туттарылыннылар. Хас биирдии киһиэхэ күүһүн, бириэмэтин уонна дууһатын ууран туран уопсай дьыалаҕа кылаатын киллэрэригэр махтал тыллара этилиннилэр.
«Эһиги биһиги аармыйабыт дьиҥнээх тыылаҕыт. Эһиги үлэҕит таҥас эрэ буолбатах, бу быыһаммыт олохтор уонна биһиги уолаттарбыт дьиэлэригэр кинилэргэ эрэнэллэрин, кэтэһэллэрин бэлиэтэ», — диэн ДОСААФ өрөспүүбүлүкэтээҕи салаатын бэрэстэбиитэлэ Константин Копылов тоһоҕолоон бэлиэтээтэ.
«Бүгүн мин «Биир ньыгыл Арассыыйа» аатыттан барыгытын эҕэрдэлиэхпин уонна махтаныахпын баҕарабын. Номнуо 4 сыл ааста. Билиҥҥи уустук кэмҥэ бары биир сыаллаахпыт – Саха сириттэн сылдьар байыастарга көмөлөһөр. Төрөөбүт дойдубут туһугар үлэлиибит, көмөлөһөбүт, бары өттүнэн харыстыырга дьулуһабыт. Эһиги бу түөрт сыл устата үтүмэн көмөнү оҥордугут. Ситиһиллибит түмүктэргэ тохтообокко, хамсааһын сайдан, кыаҕыран иһэр. Биһиги бары Кыайыы туһугар үлэлиибит», — диэтэ «Биир ньыгыл Арассыыйа» баартыйа Саха сиринээҕи салаатын ситэриилээх кэмитиэтин салайааччыта Надежда Селютина.
СӨ Ыччат миниистирин солбуйааччы, анал байыаннай дьайыы кыттыылааҕа Александр Максимов бэйэтин холобурунан, «Саха сирэ эйигинниин!» хамсааһын байыаннай дьайыыга сырыттаҕына байыастарга элбэхтик көмөлөспүтүн бэлиэтээтэ.
«Бу түөрт сыл көннөрү даата буолбатах, анал байыаннай дьайыы кыттыылааҕын быһыытынан этэбин, «Саха сирэ эйигинниин!» волонтерскай хамсааһын баарын аан бастаан байыаннай дьайыыга сылдьан истибитим. Арай биирдэ блиндажка сыттахпытына, бииргэ сылдьар уолум үрүсээгиттэн күөх, түүлээх сибиитэрэни таһааран кэппитэ уонна сылааһыын диэбитэ. Хантан ылбытын туһунан ыйыппыппар, эдьиийдэрбит, эбээлэрбит тигэн ыыппыттар диэбитэ. Биллэн турар, ыарахан усулуобуйаҕа сылдьар уолаттарга оннооҕор биир шеврон кэлэрэ даҕаны күндү буолар. Төрөөбүт дойдуларыттан кыра да кэһии кэлэрэ олус күндү буолар. Ханнык баҕарар гуманитарнай баһыылка биһиги байыастарбыт санааларын тута көтөҕөр. Байыас бу ыархаан түгэҥҥэ соҕотох буолбатаҕын, кини кэннигэр бүтүн өрөспүүбүлүкэ баарын өйдүүр. Оттон байыас бойобуой тыына үрдээтэҕинэ барыны кыайар кыахтанар. Онон күндү волонтердарбыт эһиги үлэҕит туохха да сыаналаммат», — диэн эттэ миниистири солбуйааччы.
Дьокуускай куорат баһылыгын патриотическай иитиигэ солбуйааччыта Валентин Романов түөрт сыл устата устата көхтөөх волонтердар үтүмэн үлэ оҥоһулунна диэн бэлиэтээтэ.
«Кырдьык, эһиги олус улахан үлэни оҥоро сылдьаҕыт. Эһиги байыаннай таҥаһы таһынан араас харысхаллары оҥороҕут. Анал байыаннай дьайыыга сылдьар уолаттарбыт эһиги кыһамньылаах сыһыаҥҥытынан, сылаас таҥаһы, харысхаллаары тутан санаалара көтөҕүллэр, кыайыыга дьулуһаллар. Оннооҕор атын эрэгийиэннэртэн сылдьар байыастар эмиэ көмүскэллээх буолаары биһиги уолаттарбытыгар сысталлар. Хайа да түгэҥҥэ, эһиги оҥорбут үлэҕит барыта уолаттары олус күүскэ өйүүллэр. Эһиги оҥорор өҥөҕүт, гуманитарнай көмө, харысхаллар, үтүө тыллаах суруктар – барыта кыайыыга кынаттыыр. Ол иһин куорат уокуругун уонна бэйэм ааппыттан махтанабын», — диэн эттэ кини.
Онтон Донбасска көмө уонна өйөбүл Хотугу-илиҥҥи пуондатын, «Кыайыыга бииргэ» хамыыһыйа өрөспүүбүлүкэтээҕи ыстаабын киинин салайааччыта Георгий Куркутов анал байыаннай дьайыыга сылдьар уолаттарбыт аатыттан эҕэрдэ тылларын тириэртэ.
«Уолаттарбыт эҕэрдэ тылларыттан сиэттэрэн, манна баар хамсааһын чилиэннэригэр үтүө дьыалаҕыт иһин махтанабын. Өрөспүүбүлүкэ хамыыһыйатын аатыттан уонна Хотугулуу-илиҥҥи көмө уонна өйөбүл пуондатын аатыттан эҕэрдэлиирбин көҥүллээҥ. «Саха сирэ эйигинниин!» уопсастыбаннай хамсааһын түөрт сыллаах бэлиэ түгэнэ – бу чыпчаал буолбатах, фронт уонна тыыл икки ардыларыгар быстыспат ситим бэлиэтэ, норуот күүһэ – сомоҕолоһууга сытарын толору дакаастаата», — диэн Георгий Куркутов эттэ.
Үөрүүлээх тэрээһиҥҥэ түөрт сыл устата эҥкилэ суох кыайыы туһугар үлэлээбит влонтердарга өрөспүүбүлүкэ уонна Федеральнай Сэбиэт бэрэстэбиитэлэ таһымнаах махтал суруктары туттардылар, эҕэрдэ тылларын эттилэр. Тэрээһин уопсай хаартыскаҕа түһүүнэн түмүктэннэ.
