Анаабыр улууһун Белая Гора сэлиэнньэтигэр АБДь бэтэрээнигэр аналлаах саҥа дьиэ акылаата түстэ. Үлэҕэ Саха сиринээҕи Аҕа дойду буойуннарын дьиэ кэргэттэрин кэмитиэтин уонна нэһилиэк бэрэстэбиитэллэрэ кытыннылар.
Бу туһунан брифиҥҥэ Саха сиринээҕи Аҕа дойду буойуннарын дьиэ кэргэттэрин кэмитиэтин Анаабыр улууһунааҕы координатора Зинаида Спиридонова иһитиннэрдэ.
— «Анаабыр улууһугар дойду көмүскээччилэрин уонна кинилэр чугас дьоннорун өйөөһүн үтүө үгэскэ кубулуйда. Санатан эттэххэ, 2025 сылга Белай Гораҕа икки дьиэ — АБДь кыттыылааҕар уонна биһиги буойуммут огдооботугар ситиһиилээхтик тутуллан үлэҕэ киирбиттэрэ», — диэн бэлиэтээтэ кини.
2026 сылга Белая Гора сэлиэнньэтигэр АБДь бэтэрээннэрин өйүүр киэҥ далааһыннаах үлэ салҕанан, өссө икки чааһынай дьиэ тутуллуоҕа диэн Спиридонова эттэ.
— «Белай Гораҕа өссө икки АБДь бэтэрээнигэр дьиэ тутар былааннаахтар. Биһиги уопсай сорукпут — эргиллэн кэлбит хас биирдии буойун уонна дьоруой хас биирдии дьиэ кэргэнэ төрөөбүт дойдуларыгар дьиэлээх-уоттаах буолалларын хааччыйыы. Уот ситимин тардыыга, ол иһигэр таһырдьааҥҥы уоту тардыыга уонна дьиэ иһинээҕи уот тэрилин босхо оҥорон биэрэр исписэлиистэргэ, РЭС үлэһиттэригэр ураты махталбытын тиэрдэбит», — диэн эттэ Зинаида Спиридонова.
Санатан эттэххэ, КСВО 2022 сыл ахсынньы ыйыгар Арассыыйа бэрэсидьиэнэ Владимир Путин көҕүлээһининэн тэриллибитэ. Саха сиринээҕи салаата 2023 сыл тохсунньутугар өрөспүүбүлүкэ Ил Дархана, «Биир ньыгыл Арассыыйа» баартыйа Саха сиринээҕи салаатын сэкирэтээрэ Айсен Николаев өйөбүлүнэн үлэтин саҕалаабыта.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.
Сиһилии: https://www.sakha.gov.ru/news/57351