Байыаннай дьайыы бэтэрээннэрэ Саха сирэ кыттыспыт «Сад памяти» норуоттар икки ардыларынааҕы аахсыйаҕа кыттыыны ыллылар.
Кыайыы пааркатыгар араас сылларга Ийэ дойдуларын көмүскээбит дьоруойдары кэриэстээн үүнээйилэри олоттулар.
Байыаннай дьайыы бэтэрээнэ Александр Находкин санаатын үллэһиннэ.
—Аҕа дойду сэриитигэр сылдьыбыт эһэлэрим ааттарыгар, ону тэҥэ байыаннай дьайыыга олохторун толук уурбут байыастары кэриэстээн мас олортум. Манна кэлэн бу олордубут маспын көрө сылдьыам. Кыайан үүммэтэҕинэ, хайаан да саҥаны олордуом. Маннык аахсыйалар өрөспүүбүлүкэбитигэр уонна куораппытыгар улахан суолталаахтар. Пааркаларга эрэ буолбакка, атын сирдэргэ эмиэ үүнээйилэри, мастары, талахтары олордуохха наада. Бүгүн аахсыйаҕа «Аҕа дойдуну көмүскээччилэр» пуонда филиалын ыҥырыытынан байыаннай дьайыы бэтэрээннэрэ уонна Сахабыт сирин олохтоохторо кэлэн кыттыыны ылбыттарыттан үөрэбин. Бу аахсыйаҕа кыттыбыт дьону бука барыларын хайгыыбын, — диэтэ Александр Находкин.
Байыаннай дьайыы бэтэрээнэ Валентин Иванов бу аахсыйа киниэхэ ураты суолталааҕын бэлиэтээтэ.
—Үөрэхпинэн историк буолабын. Онон бу аахсыйа миэхэ ураты суолталаах. Манна кыттарбыттан үөрэбин. Бу куорат олохтоохторугар уонна тэрээһин бары кыттыылаахтарыгар суолталааҕа көстөр. Инникитин даҕаны маннык көҕүлээһиннэри көхтөөхтүк өйүүллэригэр баҕарабын. Аахсыйа Ийэ дойдуларын уонна көлүөнэлэр кэскиллэрин туһугар олохторун толук уурбут байыастар сырдык ааттарыгар сүгүрүйэрбитин, кинилэри өйдүү-саныы сылдьарбытын, ытыктабылбытын көрдөрөр.
«Сад памяти» аахсыйа дойду үрдүнэн мөлүйүөнүнэн дьону түмэр. Бүгүҥҥү күҥҥэ Саха сиригэр номнуо сэттис сылын ыытыллар аахсыйа чэрчитинэн тыһыынчанан үүнээйи, мас арааһа, бэс, хатыҥ, харыйа уонна кедр олордуллубут. Итиэннэ бу сыыппара маннык суолталаах көҕүлээһиннэр көмөлөрүнэн салгыы улаатан, элбээн иһэр.
Сиһилии: https://www.sakha.gov.ru/news/51510
СӨ Ил Дарханын уонна Бырабыыталыстыбатын пресс-сулууспата