Покровскай куорат уонна Өктөм нэһилиэгин баһылыктара, ону тэҥэ байыаннай дьайыы бэтэрээнэ байыаннай дьайыы зонатыгар сырыыларын түмүктээтилэр. Кинилэр инники кирбиигэ сулууспалыыр Хаҥалас улууһун байыастарыгар гуманитарнай көмөнү тиэртилэр.
Покровскай куорат баһылыга Виктор Константинов иһитиннэрбитинэн, дэлэгээссийэ сүрүн байыаннай сорудахтарынан сылдьыбыт, ол курдук Запорожскай уонна Купянскай хайысхаларынан тиийбит. Үлэ бастаан Донецкайтан саҕаламмыт, онтон дэлэгээссийэ Луганскай уобаласка тиийэн «Боотур» этэрээт байыастарын кытта көрсүбүтүн туһунан «Хаҥалас» хаһыат (ханаласгазета.рф) суруйар.
«Биһиги байыастарга тус аадырыстаах баһыылкаларын таһынан, саамай наадалаах көмүскэнэр тэриллэри тиэртибит: дроннары булар анал тэриллэри, антидрон суорҕаннары, маскировочнай сиэккэлэри уонна таҥаһы-сабы. Ону таһынан Нөмүгү нэһилиэгиттэн Дмитрий Захаров үүннэрбит сибиэһэй оҕуруот аһа уонна Римма Ильина ытыс үрдүгэр тутан ыыппыт быыппаҕа байыастарбытыгар ураты соһуччу бэлэҕинэн буоллулар. Сахабыт сирин ытык бырааһынньыга — Ыһыах иннинэ маннык ас-таҥас тиийбитэ уолаттарбыт санааларын улаханнык көтөхтө. Ону тэҥэ Ньургуйана Заморщикова уолаттарга анаан эмтээх саха чэйин- кучу отун ыыппытын тутан үөрдүлэр», — диэн кэпсиир Виктор Константинов.
