Бу күннэргэ Тымныы полюһунан аатырар Өймөкөөн улууһун Төрүт нэһилиэгэр үлэ күөстүү оргуйар: субуотунньук, аһымал аахсыйа, тэрээһин арааһа.
Бу ыытыллар үлэ туһунан нэһилиэк уопсастыбанныга Анфиса Кривошапкина санаатын маннык үллэһиннэ:
– Соторутааҕыта саҥа састаабынан тэриллибит Дьахтар сэбиэтэ (сал. Чэмэлиинэ Атласова) үлэтин бэрт тэрээһиннээхтик саҕалаата. Ол курдук, нэһилиэк дьахталлара түөлбэлэринэн субуотунньуктары тэрийбиттэрэ. Ыам ыйын 22 күнүгэр сахаларга сайылык бырааһынньыгынан, Ньукуолунунан ытык кырдьаҕастарбытын – тыыл бэтэрээннэрин, сэрии оҕолорун уонна соҕотох олорор дьоммутун дьахталлар түмсүүлэрэ дьиэлэринэн сылдьан сибиэһэй кус миининэн уонна арыылаах алаадьынан күндүлээтибит. Аҕам саастаах дьоммут, махтанан туран алгыс тылларын эттилэр. Бу нэһилиэкпитигэр бастакы сонун аһымал аахсыйа дьахтар сэбиэтин атын да дьону түмэр тэрээһиннэрин ыытарыгар “күөх уоту” уматта. Маныаха саҥа тэриллибит уопсастыбаннай түмсүүгэ улуус мунньаҕын дьокутаата Уруйдаана Егорова улахан өйөбүлү оҥорор. Уруйдаана Васильевна нэһилиэк уһуйаанын кэлэктиибин салайар. Урукку сылларга дьахтар сэбиэтин салайа сылдьыбыт улахан уопуттаах буолан, Чэмэлиинэ Петровнаҕа өйөбүл буолара хайҕаллаах суол. Дьахтар сэбиэтэ бу күннэргэ аны Оҕо күнүн бырааһынньыгар араас үөрүүлээх түгэннэри бэлэхтиир соруктаах бу бэлиэ күҥҥэ бэлэмнэнэр.
Ити курдук, төрүттэр араас тэрээһиннэри ыытан, бэрт көхтөөхтүк олороллор.