СӨ “Оһуохай” түмсүүтэ өрөбүл аайы Дьокуускай куорат Арчы дьиэтигэр араас улуустары түмэн оһуохайдатар буолан, манна дьон тоҕуоруһа мустар.
Ааспыт өрөбүлгэ тэриллибит оһуохайга аммалар ыалдьыттаан аастылар. Амма оһуохайын үйэтиппит саха норуотун талааннаах ырыаһыта, олоҥхоһута, оһуохайдьыта Устин Нохсоороп оһуохайын тарҕата сылдьар аммалары Ф. Потапов аатынан норуот айымньытын дьиэтин оһуохай салаатын салайааччыта Анфиса Федорова салайан аҕалбыт. Үс массыынанан айаннаан кэлэн, 10 этээччи уонна таһаарааччы Амма оһуохайын анаан билиһиннэрдэ. Манна Нохсоороптуу матыыптаах, аммалыы ураты хаамыылаах оһуохайы оройуттан туттулар.
Бу бүгүҥҥүлэрин курдук буолбакка, хаһан эрэ сыл аайы ыытар ыһыахтарыгар оһуохай күрэһигэр олус аҕыйах киһи кыттар эбит.
— Болугуртан — Афанасий Максимов, Амматтан — Анна Чемезова, Илья Неустроев‑Ырыа Ылдьаа, Абаҕаттан — Василиса Винокурова, Бөтүҥтэн Иван Левин курдук дьон кыттар буоллаҕына, “оһуохайдаатыбыт ээ…” диэн үөрэрбит. Сылтан сыл этэр дьоммут аҕыйаан, улахан кыһалҕа буолбута. Арааһы бары толкуйдаан, дьону тардар сорук турбута. 2009 сылтан Амма нэһилиэгин тэрилтэлэрин икки ардыларыгар ыытыллар “Оһуохай дьиэрэйдин мин Аммам үрдүнэн!” диэн күөн күрэс балаһыанньатын оҥорон, олунньу 13 күнүгэр — Төрүт тыл күнүгэр саҕалаабыппыт. Ол онтон Устин Нохсоороп аммалыы түөлбэ оһуохайын киэҥ эйгэҕэ таһаарыы, дьоҥҥо-сэргэҕэ билиһиннэрии саҕаламмыта. 2016 сыл муус устар 27 күнүттэн ыла Өрөспүүбүлүкэ күнүгэр Албан аат болуоссатыгар тиһигин быспакка ыыта сылдьабыт. Ыччаты тардар инниттэн, сыл аайы улууспутугар Устин Нохсоороп аатынан чабырҕахха, тойукка, ырыаҕа-тойукка күөн күрэс ыытабыт. Амма оһуохайа икки хаамыылааҕынан олох ураты. Бүлүү бөлөх да, киин улуус да оһуохайыгар маарыннаабат — киириитэ дьиэрэтиитэ суох, тута дэгэрэҥинэн барар. Онон улахан күрэскэ кыттарбытыгар “биирдии строканан” хаамабыт. Оһуохайдьыт бэйэтэ “бардаҕына”, матыыбын кыайан таһаарбат. Амма оһуохайын этээччи бэйэтигэр сөп түбэһэр кынатчыттаах буолуон наада, — диэн санаатын үллэһиннэ Амма улууһугар “Оһуохай” түмсүүнү салайар Анфиса Федорова.
Салгыытын «Саха сирэ» хаһыат кулун тутар 6 күнүнээҕи 8 нүөмэригэр ааҕыҥ.