Саха сиригэр бырааска тиийбэккэ эрэ, ыраахтан (дистанционнайдык) MAX мессенджер нөҥүө 10 тыһыынча больничнай сабылынна диэн Доруобуйа харыстабылын министиэристибэтигэр иһитиннэрдилэр.
Саха сиригэр онлайн-сервистэри сайыннарыы Арассыыйа Бэрэсидьиэнэ Владимир Путин көҕүлээбит «Уһун уонна көхтөөх олох» («Продолжительная и активная жизнь») национальнай бырайыак, «Биир Ньыгыл Арассыыйа» баартыйа норуодунай бырагырааматын «Чэгиэн инники кэм» («Здоровое будущее») бырайыагын чэрчитинэн, ону тэҥэИл Дархан Айсен Николаев «СӨ уопсастыба доруобуйатын бөҕөргөтүү уонна доруобуйа харыстабылын тиһигин сайыннарыы стратегическай хайысхаларын туһунан» стратегическай ыйааҕын сыалларын-соруктарын толорууга олоххо киирэр.
«Бырааска ыраахтан суруйтарыы, MAX сервис нөҥүө электроннай больничнайы оҥотторуу – Саха сирин бары олохтоохторугар инники диэки улахан хардыынан буолар. Аныгы сыыппара технологияларын туһанан, киһи бириэмэтин уонна күүһүн кэмчилиир, биһиги курдук киэҥ-куоҥ сирдэрдээх өрөспүүбүлүкэҕэ ураты суолталаах. Маннык технологиялары сайыннарыыга «Биир Ньыгыл Арассыыйа» баартыйа дойду сайдыытын биир сүрүн хайысхатын мэлдьи көрөрө. Доруобуйа харыстабылын эйгэтигэр сыыппараҕа көһүү дьон олоҕун уһатыыга туһаайыллыбыт «Чэгиэн инники кэм» баартыйа бырайыагын чэрчитинэн олоххо киллэриллэр», – диэн «Биир Ньыгыл Арассыыйа» баартыйа Саха сиринээҕи салаатын сэкиритээрин солбуйааччыта, Дьокуускайдааҕы өрөспүүбүлүкэтээҕи офтальмологическай килиниичэскэй балыыһа кылаабынай бырааһа Иван Луцкан бэлиэтээтэ.
Эрэгийиэннээҕи Доруобуйа харыстабылын министиэристибэтигэр бэлиэтээбиттэринэн, больничнайы балыыһаҕа барбакка эрэ — национальнай мессенджэргэ бырааһы кытта онлайн-консультация кэмигэр сабыахха сөп. Туһанааччы докумуон бэлэм буолбутун туһунан иһитиннэриини MAX мессенджэргэ баар «Госуслуги» чат-ботугар ылыаҕа. Бырааска суруйтарыахха эбэтэр больничнайы MAX мессенджэргэ @zapismzsakha_bot чат-бот нөҥүө сабыахха сөп.
MAX национальнай мессенджер өрөспүүбүлүкэ биир сүрүн официальнай коммуникационнай былаһааккатынан буолар, манна олохтоохтор былаас уорганнарын үлэтин уонна саҥа цифровой сервистэр тустарынан иһитиннэриини тута ылаллар. СӨ Ил Дархана Айсен Николаев MAX платформаҕа бэйэтин ханаалын ыытар: https://max.ru/aisen_nikolaev.
Сиһилии: https://www.sakha.gov.ru/news/43209