РФ Бырабыыталыстыбата 2030 сылга диэри биирдиилээн дьиэ тутуутун сайыннарыы дьаһалларын бигэргэттэ.
Арассыыйа бырабыыталыстыбата 2030 сылга диэри биирдиилээн дьиэ тутуутун (ИЖС) сайыннарыыга дьаһаллар комплекстарын бигэргэттэ. Бырагыраама чааһынай дьиэлэр тутууларын үрдэтиигэ туһуланар.
Дьаһаллар салааны үп-харчы да, тэрийии да өттүнэн өйөбүллэри киллэрэллэр. Сүрүн хайысхалара — биирдиилээн олорор дьиэни тутууга саҥа сир учаастактарын эргииргэ тардыы; наадалаах инфраструктураны уонна гаастааһыны сайыннарыы; эрэгийиэннээҕи уонна бэдэрээттэһэр тэрилтэлэри өйөөһүн; эскроу-счеттары туһанан дьиэлэри тутуу туһунан дьоҥҥо иһитиннэрии.
Чааһынай дьиэлэри тутууга дьон үбүн көмүскээһиҥҥэ туспа болҕомто ууруллуоҕа. Эскроу-счеттары туһаныы бэдэрээтчиттэри кытта төлөбүрү аахсыыга кутталы аччатыахтаах.
«Кэнники сылларга Арассыыйа олохтоохторо биирдиилээн олорор дьиэни тутуутугар интэриэстэрэ үрдээн иһэрин көрөбүт. 2019 сылтан саҕалаан чааһынай дьиэлэри туттуу элбээн иһэрэ бэлиэтэнэр. Уопсайынан, бу кэмҥэ 370 мөл. кв.м тахса биирдиилээн олорор дьиэ үлэҕэ киирбит. Онуоха 2025 сылга историяҕа бастыҥ көрдөрүү ситиһиллибитэ – 63,5 мөл. кв.м.», — диэн РФ Бырабыыталыстыбатын бэрэссэдээтэлин солбуйааччы Марат Хуснуллин тоһоҕолоон бэлиэтээтэ.
Бу хайысха үрдээһинигэр биирдиилээн олорор дьиэҕэ чэпчэтиилээх ипотека, социальнай гаастааһын уонна инженернэй ситимнэргэ холбонууну судургутутуу көмөлөспүтэ.