Саха сирин чэпчэки атлеттара марафоҥҥа (42 км) Арассыыйа чөмпүйэнээтигэр кыттарга бэлэмнэнэллэр. Бу эппиэтинэстээх күрэх дойду бастыҥ күрэсчиттэрин ыам ыйын 3 күнүгэр Казань куоракка түмүөҕэ диэн «Триумф» пресс-сулууспата иһитиннэрэр.
Саха сирин чэпчэки атлетикаҕа Федерацията иһитиннэрбитинэн, өрөспүүбүлүкэ сүүмэрдэммит хамаандатын сайаапкатыгар ааттаах-суоллаах күрэсчиттэр киирдилэр. Ол курдук, Арассыыйа успуордун маастардара Алена Татаринова, Роман Алексеев, Эдуард Дьяконов, успуорт маастарыгар хандьыдааттар Константин Драгунов, Саргылана Лугинова, Татьяна Артемьева уонна Леонид Зыков бааллар.
Кыайыылаахтар кэккэлэригэр киирэргэ Саха сирин биир саамай биллиилээх күрэсчитэ, норуоттар икки ардыларынааҕы кылаастаах усупорт маастара Наталья Леонтьева эмиэ күрэхтэһиэҕэ.
Санаттахха, ааспыт сылга Татаринова уонна Леонтьева боруонса мэтээл призердарынан буолбуттара. Оччолорго кинилэр финишка тэҥҥэ сүүрэн кэлбиттэрэ.
Арассыыйа чөмпүйэнээтэ Татарстаҥҥа ыам ыйын 1 күнүттэн 3 күнүгэр диэри араас дистанцияларга ыытыллар Казаннааҕы марафону кытта тэҥҥэ буолуоҕа. Бу улахан маассабай успуорт тэрээһинэ Арассыыйа эрэ эрэгийиэннэриттэн буолбакка, тас дойдулартан эмиэ рекорд олохтуур элбэх кыттааччыны түмүөҕэ диэн күүтүллэр.