От ыйын 10 күнүттэн «Саханефтегазсбыт» АУо үс филиалыгар – Дьокуускайдааҕы, Аллараа Бэстээхтээҕи уонна Томмоттооҕу нефтебаазаларга – уматык атыытыгар быстах кэмнээх күннээҕи хааччахтар киллэрилиннилэр.
Бу хааччахтар ааттаммыт нефтебаазалартан хааччыллар Дьокуускай куоракка, Жатайга, ону таһынан Нам, Хаҥалас, Горнай, Мэҥэ Хаҥалас, Таатта, Уус Алдан, Амма, Алдан уонна Нерюнгри улуустарыгар баар сапыраапкаларга тарҕаналлар.
От ыйын 14 күнүттэн маннык хааччахтар Алдан улууһун Улуу сэлиэнньэтигэр баар, урут лимиитэ суох үлэлии олорбут, 16 №-дээх контейнернай АЗС-ка эмиэ киллэрилиннилэр.
Мантан инньэ биир массыына бааҕар 30 лиитэрэттэн ордуга суох бэнсиин уонна 50 лиитэрэттэн ордуга суох дизельнэй уматык атыыланар.
Ону таһынан, Дьокуускайдааҕы нефтебаазаҕа АИ-92, АИ-95, АИ-98 мааркалаах бэнсииннэри уонна дизельнэй уматыгы харчынан уонна каартанан атыылааһын Дьокуускай куорат 1, 3, 4 №-дээх автоматизированнай АЗС-тарыгар быстах кэмҥэ тохтотулунна.
Бу быһаарыы Саха Өрөспүүбүлүкэтин Бырабыыталыстыбатын кытта сөбүлэһэн ылылынна. Миэрэ уматык саҥа баартыйата кэлиэр диэри уматык саппааһын харыстыырга уонна туһанааччылары биир кэлимник хааччыйарга туһуланар. Лимиит кээмэйэ уматык баар тобоҕор, кэлэрэ бигэргэтиллибит таһаҕаска уонна хааччыллыы былааннаммыт таһымыгар олоҕуран быһаарылынна.
Аллараа Бэстээхтээҕи уонна Томмоттооҕу нефтебаазалартан хааччыллар АЗС-тарга уматыгы сууккатааҕы атыылааһын кээмэйэ хас биирдии станция кыаҕыттан уонна ирдэбилиттэн көрөн, 9-тан 34-кэ диэри туоннанан олохтонно.
Онуоха, быыһыыр сулууспалар уонна атын суһал үлэлиир салаалар уматык матырыйаалынан бастакы уочаратынан уонна ханнык да хааччаҕа суох хааччыллаллар.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата