Амма улууһугар «Амма Кытыла» диэн ааттаах саҥа сахалыы киинэни устуу саҕаланна. Бырайыагы Амма улууһуттан төрүттээх режиссер Евгений Николаев олоххо киллэрэр. Генеральнай продюсерынан уонна сценарий ааптарынан Дмитрий Давыдов буолар, оттон толорооччу продюсерынан – режиссер Василий Слепцов үлэлиир.
Киинэ сүнньүнэн таптал үйэлээх тиэмэтэ уонна киһи кэрэ, үтүө сыаннастарын туһунан кэпсэнэр.
Хартыына СӨ Култуураҕа уонна духуобунай сайдыыга министиэристибэтин уонна «Синет» пуонда өйөбүллэринэн уһуллар, оттон тэхиниичэскэй баазаны «Сахафильм» хааччыйар. Устуу үлэтэ Саха сирин кэрэ-бэлиэ сирдэригэр – Дьокуускайга, Аллараа Бэстээххэ уонна Амма улууһун Соморсун нэһилиэгэр барар. Сабаҕалааһынынан, киинэ сүрэхтэниитэ эһиил буолуоҕа.
Бу күннэргэ СӨ култууратын миниистирэ Афанасий Ноев улууска үлэлии сылдьан, устуу бөлөҕүн кытта көрсүбүтүн туһунан бэйэтин МАХ суруйда:
«Амма улууһун Соморсун нэһилиэгэр үлэлии сылдьан, «Амма Кытыла» мелодрама-киинэ устуу бөлөҕүн кытта көрүстүм. Амма сирэ-уота кинематографистар сөбүлээбит сирдэрэ буолар. Бу дойдуга, Мээндигигэ, «Мэхээлэчээн булчут», «Тыгын Дархан», «Лоокуут уонна Ньургуһун» курдук киинэлэр уһуллубуттара. Устуу бөлөҕөр ситиһиилэри баҕарабын!», — диэн миниистир Афанасий Ноев суруйбут.