Дьокуускайдааҕы кадеттар оскуола-интэринээттэрин баазатыгар М.К.Аммосов аатынан Хотугулуу-Илиҥҥи федеральнай университет устудьуоннарыгар “Старт к вершинам” үөрэтэр-эрчийэр хомуур түмүктэннэ.
Бырагыраама биир сүрүн тэрээһининэн байыаннай дьайыы кыттыылааҕа Павел Торговкин кыттыылаах Хорсун быһыы уруога буолла.
Көрсүһүү “Дойдуну көмүскээччилэр” судаарыстыбаннай пуонда салаатын көмөтүнэн уонна пуонда “Билии” Арассыыйа уопсастыбатын кытары тэрийбит “Дойдубар сулууспалыыбын” Бүтүн Арассыыйатааҕы аахсыйа чэрчитинэн буолла.
Павел Торговкин – байыаннай дьайыы кыттыылааҕа, рота хамандыыра, Хорсун быһыы уордьаннарын уонна “Хорсунун иһин” мэтээл кавалера. Көрсүһүү кэмигэр кини устудьуоннарга байыаннай уопутун үллэһиннэ, сулууспа, доҕордоһуу уонна бэйэ-бэйэҕэ көмөлөсүһүү туһунан кэпсээтэ, эдэр дьон ыйытыыларыгар хоруйдаата.
Көрсүһүү кыттыылаахтара ураты болҕомтолорун төрөөбүт дойдуга таптал, бэриниилээх буолуу, бэйэ быһыытыгар-майгытыгар эппиэтинэһи ылыы уонна үйэлээх доҕордоһуу курдук олох сыаннастарыгар уурдулар. Бэтэрээн кэпсээнин устудьуоннар олус кэрэхсээтилэр.
“Старт к вершинам” үөрэтэр-эрчийэр хомуур ыччаты патриоттыы тыыҥҥа иитиигэ уонна быраактыкаҕа үөрүйэхтэри ылыыга ананар. Устудьуоннар бырагыраама быһыытынан пилота суох көтөр аппараты салайарга үөрэнэллэр, тактическай уонна инженернэй бэлэмнэниини ааһаллар, ону сэргэ тактическай мэдиссиинэ төрүттэрин билэллэр.
Байыаннай дьайыы бэтэрээннэрэ маннык тэрээһиннэргэ кыттыылара эдэр дьон кинилэртэн байыаннай сулууспа, дойдуга ытык иэс уонна эппиэтинэс, көлүөнэлэр утумнааһыннарын уонна ыччаты патриоттуу тыыҥҥа иитии туһунан билэллэригэр көмөлөөх.
“Дойдубар сулууспалыыбын” Бүтүн Арассыыйатааҕы аахсыйа бэтэрээннэри уонна эдэр көлүөнэни салгыы түмэр.
СӨ Ил Дарханын уонна Бырабыыталыстыбатын пресс-сулууспата