Дьокуускайга 1-кы нүөмэрдээх 253 үөрэнэээччигэ анаммыт саҥа оскуола үөрэнээччилэрин көрсөргө бэлэмнэнэр. Бүгүн, атырдьах ыйын 15 күнүгэр, эбийиэги Ил Дархан Айсен Николаев кэлэн көрдө.
⠀
Өрөспүүбүлүкэ баһылыга оскуола үөрэтэр хосторун уонна тэриллибит инфраструктуратын билистэ. Кини саҥа дьиэ аһыллыыта оҕолорго үөрэнэллэригэр аныгы уонна табыгастаах усулуобуйаны хааччыйарын бэлиэтээтэ.
«Дойду Бэрэсидьиэнэ Владимир Владимирович Путин бигэргэппит Дьокуускай агломерациятын маастар-былаана — бу тутуу эрэ буолбатах, куорат олохтоохторугар саҥа олох эйгэтин тэрийии. 1-кы нүөмэрдээх оскуола — сүрүн эбийиэктэртэн биирдэстэрэ. Уустук усулуобуйаҕа биһиги тутууну түмүктээтибит. Бытархай ситэтэ суох үлэлэр сотору кэминэн туоратыллыахтара, оттон балаҕан ыйын 1 күнүгэр оскуола 300-тэн тахса үөрэнээччигэ аанын аһыаҕа. Мин эрэнэбин, Дьокуускай киинин 60–70-с сылларын истиилинэн оҥоһуллубут оскуола биһиги киин куораппыт биир ураты киэргэлэ буолуоҕа», — диэн бэлиэтээтэ Айсен Николаев.
Саҥа түөрт мэндиэмэннээх дьиэ Ленин проспегар турар. Уопсай иэнэ 6 тыһыынча квадратнай миэтэрэттэн тахса. Бырайыагынан эбийиэк таһынааҕы сирин тупсарыы уонна успуорт былаһааккалара учуоттаммыттар.
Оскуола дириэктэрэ Таисия Горохова этэринэн, саҥа дьиэҕэ алын кылаас уонна 10–11-с кылаас үөрэнээччилэрэ үөрэниэхтэрэ. Быйыл манна 75 оҕо маҥнайгы кылаас киириэхтээх. Үрдүкү кылаастарга үөрэх үһүс мэндиэмэҥҥэ тэриллиэҕэ.
Сиһилии: https://www.sakha.gov.ru/news/59612