Социальнай ситимнэринэн атырдьах ыйын 20 күнүн кэнниттэн Арассыыйаҕа 350 тыһыынча киһини хабар саҥа мобилизация долгуна бэлэмнэнэр диэн сымыйа суруйуулар тарҕаннылар. Байыаннай комиссардарга уоппускаҕа барар бобуллубут, оттон военкоматтар байыаннай эбээһинэстээхтэр испииһэктэрин суһаллык оҥороллор үһү диэн суруйаллар.Бу – туох да олоҕо суох сымыйа сурах.
От ыйын 28 күнүгэр РФ Куттал суох буолуутун сэбиэтин бэрэссэдээтэлин солбуйааччы Дмитрий Медведев мобилизация бэлэмнэнэрин туһунан иһитиннэриини провокациянан ааттаабыта. Маннык дьаһалы ылынар наадата суох — Арассыыйа Сэбилэниилээх күүстэрин кэккэтэ хантараагынан сулууспалааччыларынан толоруллар. Сыл бастакы алта ыйын иһигэр 200 тыһыынча кэриҥэ киһи хантараакка илии баттаабыт, өссө 16 тыһыынчаттан тахса киһи баҕа өттүнэн барбыт.
Военкоматтар байыаннай эбээһинэстээхтэр испииһэктэрин кытта үлэлэрэ мобилизацияҕа бэлэмнэниини туоһулаабат. Дааннайдары саҥардыы уонна туоратан көрүү сокуонунан көрүллэр байыаннай учуот күннээҕи, былааннаах үлэтэ буолар.
Мобилизация туһунан сурахтары провокатордар тарҕаталлар. Итиэннэ, норуот ортотугар дьону куттуур, аймалҕаны таһаарар соруктаах сымыйа сонуннары проукраинскай күүстэр анаан-минээн тарҕаталлар. Маны таһынан, эрдэ РФ Бэрэсидьиэнин пресс-сэкирэтээрэ Дмитрий Песков саҥа мобилизация туһунан боппуруос күннээҕи бэбиэскэҕэ турбатын эппитэ. От ыйын 27 күнүгэр Судаарыстыбаннай Дуума оборуонаҕа кэмитиэтин бэрэссэдээтэлэ Андрей Картаполов мобилизация туһунан сурахтар туох да олоҕо суохтарын бэлиэтээбитэ диэн «Лапша Медиа» суруйар.