«Саханефтегазсбыт» АУо «Дьокуускайдааҕы нефтебааза» филиалын АЗС-тарыгар АИ-95 бэнсиини атыылааһыҥҥа сууккатааҕы лимииттэр олохтоннулар. Бу хааччах суһал көмө сулууспаларыттан ураты, бары атыылаһааччыларга сыһыаннаах. Бу туһунан СӨ Гражданскай оборуонаҕа уонна нэһилиэнньэ олоҕун-дьаһаҕын куттала суох буолуутун хааччыйыыга миниистирин бастакы солбуйааччыта Айаал Вензель иһитиннэрдэ.
Ол курдук, АИ-95 бэнсииҥҥэ маннык сууккатааҕы лимииттэр киирдилэр:
- НПЗС (Дьокуускай к., 202-с мкр) — 5 туонна;
- 9 №-дээх АЗС (Покровскай к.) — 1,6 туонна;
- 10 №-дээх АЗС (Мохсоҕоллоох) — 1,3 туонна;
- 11 №-дээх АЗС (Маҕарас) — 1,3 туонна;
- 56 №-дээх АЗС (Булгунньахтаах) — 1,1 туонна;
- КАЗС (Илбэҥэ) — 1,1 туонна;
- 7 №-дээх АЗС (Кангалассы) — 0,6 туонна.
Бу ааттаммыт ыстаансыйаларга барытыгар АИ-92 бэнсиини кумааҕы харчынан да, баан каартатынан да атыылааһын тохтотулунна.
Оттон 1, 3 уонна 4 №-дээх АЗС-тарга төлөбүргэ урут киллэриллибит хааччахтар оннунан хаалаллар. 2, 6, 8, 12, 15, 51, 62 №-дээх АЗС-тар уонна Сиинэҕэ баар КАЗС ханнык да лимиитигэр хааччаҕа суох үлэлииллэр.
«Бу быстах кэмҥэ ылыллыбыт дьаһаллар уматыгы тэҥҥэ түҥэтэр туһуттан киллэриллибиттэрэ. Уматык саҥа баартыйата кэллэҕинэ, лимииттэр көрүллүөхтэрэ. Билигин Саха сиригэр эбии кээмэйдээх уматык айаннаан иһэр», — диэн бэлиэтээтэ Айаал Вензель.
Санатан эттэххэ, хотугу таһаҕас тиэйиитин чэрчитинэн Арктика уонна хотугу улуустарга уматыгы, чоҕу уонна да атын олоххо-дьаһахха суолталаах таһаҕастары тиэйии былаан быһыытынан кэһиллиитэ суох барар.
СӨ Ил Дарханын уонна СӨ Бырабыыталыстыбатын пресс-сулууспата
Сиһилии: https://www.sakha.gov.ru/news/59617