С.М. Аржаков аатынан АГАТУ ипподромугар ат сүүрдүүтүн күрэҕэ буолла. Күрэхтэһии сүрүн түгэнинэн Иссад (1800 м) уһулуччулаах көрдөрүүтэ буолла. Кини 1800 миэтэрэни 01.54.80 мүнүүтэнэн кэлэн, бастыҥ түмүгүн олохтооото. Иккис улахан долгутуулаах түгэнинэн 1 мөлүйүөн солкуобай бириистээх Дербигэ Күндүмэн кыайыыта ааттанна. Бу туһунан Саха сирин Ат успуордун федерациятын пресс-сулууспата иһитиннэрэр.
Күрэхтэһиигэ өрөспүүбүлүкэ араас улуустарыттан ыраас хааннаах уонна саха атын кытта буккуур хааннаах бастыҥ сүүрүк аттар кытыннылар. Бырагыраамаҕа барыта алта сүүрүү киирдэ. Улахан бириистээх уонна ат успуордун биллиилээх диэйэтэллэрин үбүлүөйдэригэр анаммыт анал сүүрүүлэр дьон болҕомтотун ордук тартылар.
1-кы сүүрүү: В.Е. Зырянов уонна С.С. Васильев 55 саастарыгар анаммыт бириис (1000 м, 2 саастаах ыраас хааннаах аттарга) Бастакы миэстэни Бөртө Куо биэ ылла (жокей И.В. Иванов, тириэньэр И.В. Иванов, «Егоров М.М.» БХ), түмүгэ — 01.06.00. Иккис миэстэҕэ Карат («Давидофф» ХЭУо, Амма улууһа), үһүскэ — Кайра (Ю.С. Ларионова) таҕыстылар.
2-с сүүрүү: Майлердар куубактара (1800 м, 3 уонна онтон аҕам саастаах ыраас хааннаах аттарга) Бу дистанцияҕа Иссад атыыр (тириэньэр А.И. Неустроев, маастар-жокей С.Г. Николкин) күн бастыҥ көрдөрүүтүн ситистэ — 01.54.80. Кыайыылаах 500 000 солкуобайы тутта. Иккиһинэн Евр кэллэ (300 000 солк.), үсүһүнэн — Аксель (200 000 солк.).
3-с сүүрүү: С.В. Хахыров сырдык аатыгар бириис (2400 м, 4 уонна онтон аҕам саастаах ыраас хааннаах аттарга) Кыайыылааҕынан Атомик Бой (тириэньэр А.И. Неустроев, жокей С.Г. Николкин) таҕыста, түмүгэ — 02.33.43 (бирииһэ — 250 000 солк.). Иккис миэстэни Аутлендер ылла (100 000 солк.), үһүс — Спартанец Ром (150 000 солк.).
4-с сүүрүү: Н.И. Пинигин сырдык аатыгар бириис (2400 м, Уһук Илиҥҥэ төрөөбүт 3 уонна онтон аҕам саастаах ыраас хааннаах аттарга) Бастакынан Батл Мэн кэллэ (Урбаанньыт А.И. Неустроев, жокей С.Г. Николкин), бириэмэтэ 02.39.63, бирииһэ — 200 000 солк. Иккис миэстэ — Дайан (120 000 солк.), үһүс миэстэ — Нейтрон (80 000 солк.).
5-с сүүрүү: Дерби бирииһэ (2400 м, Саха сиригэр төрөөбүт 3 саастаах ыраас хааннаах аттарга) Саамай улахан бириистээх түгэнинэн Дерби сүүрүүтэ буолла. Манна Күндүмэн кыайыы өрөгөйүн биллэ (Мэҥэ Хаҥалас улууһун салалтата, жокей С.М. Гаврильев, тириэньэр Ст.В. Тимофеев). Кини 2400 миэтэрэни 02.42.36 бириэмэнэн кэлэн, 1 мөлүйүөн солкуобайга тигистэ. Иккис миэстэни Мэйзи Куин ылла (500 000 солк.), үһүс — Космобой (300 000 солк.).
6-с сүүрүү: С.И. Еремеев 60 сааһыгар анаммыт бириис (2400 м, саха атын кытта буккуур хааннаах аттарга) Олохтоох боруода аттарыгар Кынат бастыҥынан ааттанна («Сахатент» ХЭУо, жокей Г. Стручков, тириэньэр Ф.И. Охлопков). Бириэмэтэ — 02.46.34 (бирииһэ — 75 000 солк.). Иккиһинэн Уйгуура кэллэ (45 000 солк.), үһүс миэстэҕэ — Хабиб (30 000 солк.).