Арассыыйа Бэрэсидьиэнин иһинэн Саха сирин бастайааннай бэрэстэбиитэлэ — Бырабыыталыстыба Бэрэссэдээтэлин бастакы солбуйааччыта Андрей Федотов Булуҥ улууһун Хара Уулаах национальнай эбээн нэһилиэгэр — Найба сэлиэнньэтигэр үлэтинэн сырыытынан тиийдэ.
Сырыы кэмигэр дэлэгээссийэ сэлиэнньэ олохтоохторун уонна дьаһалтатын кытта көрүстэ, оскуолаҕа уонна уһуйааҥҥа сырытта. Нэһилиэк баһылыга Иннокентий Иванов Найба билиҥҥи туругун уонна олоҕун-дьаһаҕын туһунан кэпсээтэ.
Көрсүһүүгэ ордук улахан болҕомто Найбаҕа муора терминалын тутуутугар бэлэмнэнии үлэтигэр уурулунна. Дэлэгээссицэ чилиэннэрэ бэлэмнэнии үлэтэ хайдах баран иһэрин бэйэлэрин харахтарынан көрөн сыаналаатылар уонна олохтоохтору кытта нэһилиэк инфраструктуратын сайыннарыы боппуруостарын дьүүллэстилэр.
Санатан эттэххэ, быйыл атырдьах ыйын 26 күнүгэр «Таймыр Инжиниринг» ХЭТ инвестор-тутааччы бырайыак бастакы түһүмэҕин олоххо киллэрэргэ анаан тутуу тиэхиньикэтин уонна ресурсаларын мунньууну саҕалаабыта.
Булуҥ улууһугар муора дириҥ уулаах таһаҕас тиэйэр терминалын тутуута — 2036 сылга диэри Уһук Илини сайыннарыы Стратегиятын чэрчитинэн өрөспүүбүлүкэ биир саамай сүрүн бырайыагынан буолар.
Бу саҥа пуорт туох кыаҕы биэриэй?
- «Мохэ — Найба» Трансарктическай тырааныспар көрүдүөрүн сүрүн муоратааҕы түмүгүнэн буолуоҕа;
- Арктика улуустарыгар сыл төгүрүччү таһаҕаһы тиэйиини хааччыйыаҕа;
- Муора суолларын Өлүөнэ өрүс бассейнын суолларын кытта ситимниэҕэ.
Бу барыта хотугу таһаҕаһы тиэйии (бигэтик, харгыһа суох барарыгар олус улахан, тыын суолталаах.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.