Москва куоракка ВДНХ-ҕа баар Космонавтика түмэлигэр «Уһук Илин эрэгийиэннэрин күннэрэ» диэн онус төгүлүн ыытыллар үбүлүөйдээх быыстапка аһылынна. Быйылгы тэрээһин космос уонна инники кэм тиэмэтигэр олоҕурар, ону тэҥэ аныгы технологиялары уонна Уһук Илиҥҥэ олорор, үлэлиир дьон дьиҥнээх устуоруйаларын бииргэ түмэр.
Үөрүүлээх аһыллыыга Уһук Илин уонна Арктика сайдыытыгар миниистири бастакы солбуйааччы Виталий Алтабаев, Космонавтика түмэлин дириэктэрэ Наталья Артюхина уонна аан дойду бастакы космонавын сиэнэ, Хабаровскайдааҕы аэропорт генеральнай дириэктэрэ Юрий Кондратчик кытыннылар. Быыстапка Космонавтика түмэлигэр аһыллыбыта мээнэҕэ буолбатах — Уһук Илиҥҥэ «Восточнай» космодром үлэлиир, манна үрдүк технологиялар сайдаллар. Ол иһин быыстапка балаһаакката космос эйгэтин стилинэн киэргэтиллибит.
Быыстапкаҕа хас да интэриэһинэй интерактивнай муннуктар үлэлииллэр:
- «Уһук Илини бил»: Ыалдьыттар хас да ыйытыыга хоруйдаан, Уһук Илин кэрэ айылҕалаах сирдэригэр виртуальнай эйгэҕэ тиийэн хаалаллар. Онно оҥоһуллубут видео-аккырыыкканы тута социальнай ситимнэргэ ыытыахха сөп.
- «Уһук Илиҥҥэ карьера»: Бу мультимедийнай стендэҕэ оҕолорго уонна ыччаттарга инники идэлэрин талалларыгар көмөлөһөллөр. Оҥоһуу өй киһиэхэ сөп түбэһэр үөрэх кыһатын, идэни талан биэрэр уонна Уһук Илиҥҥэ көһөн кэлэргэ ханнык судаарыстыбаннай өйөбүллэр баалларын кэпсиир.
- Туризм уонна айылҕа: «Уһук Илин суолларынан хаам» диэн муннукка Бурятия дацаныттан саҕалаан Хабаровскай кыраай Шантарскай арыыларыгар диэри кэрэ сирдэри көрүөххэ сөп. Ону тэҥэ саҥа пешеходнай маршруттары кытта билсиэххэ уонна бэйэҕэ сөбүлээбит суолу смартфоҥҥа хачайдыахха сөп.
- Патриоттуу иитии: Биир стендэ анал байыаннай дьайыы дьоруойдарыгар уонна «ВОИН» байыаннай-патриотическай кииннэр үлэлэригэр ананар.
Быыстапка этнографическай чааһыгар киин куорат түмэллэрин пуондаларыттан ураты эспэнээттэр туруоруллубуттар. Манна XIX үйэ ортотуттан 1990 сылга диэри кэмҥэ сыһыаннаах Саха сирин, Чукотка, Камчатка уонна Хабаровскай кыраай норуоттарын култуураларын кытта билсиэххэ сөп.
Интерактивнай быыстапка сэтинньи 30 күнүгэр диэри үлэлиэҕэ.