Саха Өрөспүүбүлүкэтин Бырабыыталыстыбатын Бэрэссэдээтэлин бастакы солбуйааччыта Дьулустаан Борисов бүгүн, атырдьах ыйын 11 күнүгэр, СӨ Баай-дуол уонна сир сыһыаннаһыыларын министиэристибэтин кэлэктиибигэр миниистир саҥа солбуйааччытын Руслан Винокурову билиһиннэрдэ.
«Руслан Винокуров экэниэмикэ сүрүн салааларыгар 25 сылтан тахса үлэлээбит уопуттаах. Кини бу эйгэни олус үчүгэйдик билэр, өрөспүүбүлүкэ туһугар өр сылларга үтүө суобастаахтык үлэлээн кэлбит үрдүк кылаастаах исписэлиис буолар», – диэн Саха сирин бастакы вице-премьерэ бэлиэтээтэ.
Джулустан Борисов билигин министиэристибэ иннигэр чопчу соруктар туралларын тоһоҕолоон эттэ. Ол курдук, Арассыыйа Федерациятын судаарыстыбаннай бырагырааматын олоххо киллэрии, пространственнай дааннайдар национальнай тиһиктэрин тэрийии уонна өрөспүүбүлүкэ капитализациятын үрдэтии сүрүн соругунан буолаллар.
«Бу барыта идэтийбит дьонтон хамаанданан үлэни эрэйэр, тоҕо диэтэххэ, сир уонна баай-дуол сыһыаннаһыылара эрэгийиэн экэниэмикэтин акылаатын олохтууллар. Биһиги бииргэ үлэлээһиммит сүрүн туһаайыытынан үлэни биир кэмник эрэ толоруу буолбакка, дьиҥнээх илэ көстөр түмүктэри ситиһии буолуохтаах. Биһиги баайы-дуолу туһаныыттан бүддьүөт киириитин элбэтиэхтээхпит уонна чэпчэтиинэн туһанар гражданнар уочараттарын аҕыйатыахтаахпыт», – диэн Борисов эттэ.
Кини этэринэн, баай-дуол уонна сир сыһыаннаһыыларын министиэристибэтигэр миниистир Павел Быгынанов салайыытынан идэтийбит, биир сомоҕо кэлэктиип үлэлиир. Бу турар соруктары ситиһиилээхтик толорорго эрэллээх тирэҕинэн буолар.
Сиһилии маны баттаан аах: https://www.sakha.gov.ru/news/59228