Бэс ыйын 10 күнүттэн 18 күнүгэр диэри «Халыма» уонна «Бүлүү» федеральнай суолларга «Автоураган-МС» диэн хаартыскаҕа уонна видеоҕа устуу көһө сылдьар комплекса үлэлиэҕэ. Бу систиэмэни Уһук Илин саамай уустук уонна уһун суолларыгар туруоруохтара диэн Саха сиринээҕи Госавтоинспекция иһитиннэрэр.
Тас көрүҥэ көннөрү патрульнай массыына курдук эрээри, иһигэр уонна үрдүгэр күүстээх тэрил туруоруллубут. «Автоураган» 360 кыраадыс тула барытын көрөр хас да камералаах. Оҥоһуу өй чааска тыһыынчаҕа диэри массыына нүөмэрин аптамаатынан ааҕар — тута айаннаан иһэри кытта. Систиэмэ бу дааннайдары Госавтоинспекция баазатын кытта тута тэҥнээн көрөр.
Комплекс массыына түргэнник айанныырын, утары суолга тахсыытын, сыыһа тохтоон туруутун (парковкатын), уруулга олорон төлөпүөнүнэн кэпсэтиини уонна куру кэппэтэҕи барытын бэлиэтиир. Ону таһынан, «Автоураган» массыыналары көрдүүр баазанан бэрэбиэркэлиир: күрэтиллибит массыыналары, регистрацията тохтотуллубуттары уонна бырааптарыттан быһыллыбыт суоппардары булар.
Госавтоинспекция суоппардары суолга болҕомтолоох буолалларыгар ыҥырар. Комплекс бэлиэтээбит бары кэһиилэригэр тутатына административнай эппиэтинэскэ тардыы уураахтара оҥоһуллуохтара.