Арассыыйа Бэрэсидьиэнэ Владимир Путин Саха сирин Ил Дархана Айсен Николаевы кытта үлэ көрсүһүүтүгэр байыаннай дьайыы кыттыылаахтарын уонна кинилэр дьиэ кэргэттэрин өйөөһүн боппуруостарын дьүүллэстэ. Көрсүһүү кэмигэр дойду баһылыга ыар бааһырыыны ылбыт байыаннай сулууспалаахтарга уонна кинилэр чугас дьонноругар көмөлөһүү улахан суолталааҕын тоһоҕолоон бэлиэтээтэ.
«Ыар бааһырыыны ылбыт уолаттарга болҕомтоҕутун уураргытыгар баҕарабын. Кинилэргэ уонна дьиэ кэргэттэригэр эмиэ көмөлөһүөххэ наада, тоҕо диэтэххэ кинилэргэ эмиэ улахан ноҕурууска түһэр», – диэтэ Владимир Путин.
Айсен Николаев Бэрэсидьиэҥҥэ бүгүҥҥү күҥҥэ Саха сиригэр байыаннай дьайыы кыттыылаахтарын уонна кинилэр дьиэ кэргэттэрин өйүүр 117 миэрэ үлэлиирин туһунан иһитиннэрдэ. Ону таһынан, өрөспүүбүлүкэ дойдуга биир бастакынан Арассыыйа Бэрэсидьиэнин сорудаҕынан олохтоммут «Саха сирэ – Дьоруойдар дойдулара» каадыр бырагырааматын үлэлэппитин эттэ.
«Ыам ыйыгар биһиэхэ «Саха сирэ – Дьоруойдар дойдулара» бырагыраама бастакы выпуһа буолбута. Уолаттар олус астыналлар, үүнүөн-сайыан баҕалаахтар. Үгүстэр Госдуумаҕа праймеризка кыттыбыттара, уонна биир мандааттаах уокурукка биһиги уолбут кыайда», – диэн өрөспүүбүлүкэ баһылыга бэлиэтээтэ.
Бэрэсидьиэн бырагыраама кыттыылаахтарын өйүүр үлэни салгыырга соруйда.
Көрсүһүүгэ байыаннай сулууспалаахтары чөлүгэр түһэриигэ ураты болҕомто уурулунна. Айсен Николаев байыаннай дьайыы саҕаланыаҕыттан Москва уобалаһыгар баар «Бэс Чагда» сонотуоруй ыар бааһырыылаах буойуттары чөлүгэр түһэрэргэ ананан үлэлиирин туһунан кэпсээтэ.
Өрөспүүбүлүкэ баһылыга бу кэм иһигэр сонотуоруйга тыһыынчаттан тахса байыаннай сулууспалаах чөлүгэр түһэриллэр кууруһу ааспытын бэлиэтээтэ.
Айсен Николаев өрөспүүбүлүкэ байыаннай дьайыы кыттыылаахтарын өйүүр систиэмэни салгыы тупсарыаҕын, байыаннай сулууспалаахтар эйэлээх олоххо төннөллөрүгэр, чөлүгэр түһэллэригэр уонна сулууспа кэнниттэн олоххо миэстэлэрин булалларыгар көмөлөһүөҕүн эттэ.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата