Волонтерскай уонна уопсастыбаннай хамсааһыннар активистарын, ол иһигэр Саха сиринээҕи Аҕа дойду буойуннарын дьиэ кэргэттэрин кэмитиэтин Үөһээ Бүлүүтээҕи салаатын сомоҕолоһуулаах үлэтин түмүгэр, Үөһээ Бүлүүттэн сылдьар байыастар 2022-2025 сыллардаахха фроҥҥа 30 матасыыкылы, 37 дрону, 19 тепловизоры, хас да массыынаны, радиоэлектроннай охсуһуу уонунан кэмпилиэгин, антидроновай саалары, генератордары уонна байыаннай таҥаһы-сабы ыллылар.
Бу туһунан бүгүн брифинг кэмигэр Саха сиринээҕи Аҕа дойду буойуннарын дьиэ кэргэттэрин кэмитиэтин Үөһээ Бүлүүтээҕи координатора Валентина Тарасова иһитиннэрдэ.
«Өссө биир чаҕылхай уопсастыбаннай көҕүлээһин Балыксыт Ольга диэн аатынан биллэр, төрүт булчут уонна балыксыт Захарова Ольга Петровна көмөтүнэн үөскээбитэ. Кини мобилизацияламмыт доҕотторугар балык бэлэмнээн ыытар тус баҕа санаата кэлин киэҥ далааһыннаах хамсааһыҥҥа кубулуйбута. 2024 сыллаахха 3,5 тонна гуманитарнай таһаҕас ыытыллыбыт буоллаҕына, 2025 сыллаахха — номнуо 7 туонна тиксэрилиннэ. Бу хамсааһыҥҥа 500-тэн тахса волонтер кыттыста. „Балыксыт Ольга“ ситимэ Хабаровскайтан саҕалаан Калининградка тиийэ куораттары хабар уонна Арассыыйа үрдүнэн саха дьонун бииргэ түмэр», — диэн үллэһиннэ спикер.
Валентина Тарасова этэринэн, Үөһээ Бүлүү улууһун сүрүн волонтерскай бырайыагынан 2023 сыл ыам ыйын 2 күнүгэр Герой Ийэ Васма Иванова төрүттээбит «Дойдум тыына» иистэнэр сыаҕа буолла. «Бастаан 50 дьахтар — байыастар ийэлэрэ, кэргэттэрэ уонна эбэлэрэ — уолаттарга байыаннай таҥаһы тигэр туһугар бииргэ түмсүбүттэрэ. Оттон билигин 20-тэн тахса көрүҥнээх бородууксуйаны оҥорон таһаарар күүстээх оҥорон таһаарыыга кубулуйда. Сыах тепловизортан харыстыыр плащ-балааккалары, байыастарга аналлаах сахалыы харысхаллары уонна руна бэлиэлэрин, норуот маастардара охсон оҥорбут ураты тимир харысхалларын таһаарар. Бырайыак бородууксуйата улуус таһыгар киэҥник билиннэ: 600-тэн тахса кэмпилиэк Дьокуускайга, Мииринэйгэ, Ньурбаҕа, Аммаҕа, Москва уонна Санкт-Петербург госпиталларыгар, ону тэҥэ быһаччы анал байыаннай дьайыы зонатыгар ыытылынна», — диэн кэпсээтэ Валентина Тарасова.
Сиһилии маны баттаан ааҕыҥ: https://www.sakha.gov.ru/news/59341