Быйыл өрөспүүбүлүкэҕэ култуура сэттэ эбийиэгэр хапытаалынай өрөмүөн оҥоһуллуоҕа. Олор истэригэр Покровскай куораттааҕы «Саргы түһүлгэтэ» култуура уонна норуот айымньытын киинэ, Анаабыр улууһун кыраайы үөрэтэр-этнографиялыыр түмэлэ, Сэбиэскэй Сойуус Дьоруойа Ф.М. Охлопков аатынан кыраайы үөрэтэр түмэл, Национальнай уус-уран түмэл, Национальнай бибилэтиэкэ, Судаарыстыбаннай опера уонна балет тыйаатыра уонна Саха академическай тыйаатыра бааллар.
2026 сылга «Биир ньыгыл Арассыыйа» баартыйа «Кыра дойду култуурата» бырайыагын «Олохтоох Култуура дьиэтэ» хайысхатынан Саха сирин улуустарыгар баар 20 култуура дьиэтэ тэрилинэн хааччыллыыга субсидиялары ылыахтара. Күрэхтэһии түмүгүнэн көрүллэр үп уопсай кээмэйэ 21 мөл. солкуобайтан тахса.
Бу үлэ дойду Бэрэсидьиэнэ Владимир Путин көҕүлээбит «Дьиэ кэргэн» национальнай бырайыагын «Дьиэ кэргэн сыаннастара уонна култуура инфраструктурата» федеральнай бырайыагын, ону тэҥэ «Биир ньыгыл Арассыыйа» баартыйа норуодунай бырагырааматын чэрчитинэн ыытыллар. Арассыыйа Бэрэсидьиэнэ култуура эгэлгэтэ дойду биир сүрүн баайа буоларын хаста да тоһоҕолоон бэлиэтээбитэ.
«Эрэгийиэннэр устуоруйаларын, култуураларын баайын, уратыларын харыстыырга туох баар наадалааҕы барытын оҥоруохха наада. Дьон кэм-кэрдии ситимнэһиитин билэллэрин, биһиги уопсастыбабытыгар мэлдьи суолталаах буолуохтаах сыаннастары ис сүрэхтэн өйдүүллэрин-үллэстэллэрин, биһиги тугунан киэн туттуохпутун сөбүн уонна тугунан киэн туттуохтаахпытын билэллэрин туһугар», — диэн бэлиэтээбитэ дойду баһылыга.
Д.К. Сивцев — Суорун Омоллоон аатынан Судаарыстыбаннай опера уонна балет тыйаатырыгар икки сыл устата оҥоһуллуохтаах өрөмүөн үлэтэ үгэнигэр. Үбүлээһин уопсай кээмэйэ 51 мөл. солкуобайга тэҥнэһэр. 2026 сылга үлэлэр көрөөччүлэр сылдьар сирдэригэр ыытыллаллар. Көрөөччү саалатыгар, фойеҕа, камернай саалаҕа, буфекка, гардеробка муостаны, ону тэҥэ дьиэ тас көстүүтүн саҥардыахтара, каассалары атын сиргэ көһөрүөхтэрэ. «Синтра» ХЭУо-ны кытта дуогабар бэс ыйын 29 күнүгэр баттаммыта. Өрөмүөн бастакы түһүмэҕин 2026 сыл балаҕан ыйын бүтүүтүгэр диэри түмүктүүр былааннанар.