Ыам ыйын 1 күнүттэн Арассыыйа үрдүнэн «Уһук Илин — айылҕа мүччүргэннээх сырыылара» IV күрэсхэ сайаапкалары хомуйуу саҕаланна.
2022 сыллаахха Илиҥҥи экэнэмиичэскэй пуорум чэрчитинэн тэриллибит бырайыак номнуо төрдүс сылын дойду араас муннугуттан айылҕаҕа сылдьарын, айанныырын сөбүлүүр дьону түмэр. Саҥа сезоҥҥа күрэххэ хас да уларыйыы киирдэ: сүрүн номинациялар ахсааннара 5-кэ диэри улаатта. Уруккуттан баар хайысхаларга — сатыы, уунан, кыһыҥҥы уонна Арктика айаннарыгар эбии «Кыайыы ыллыктара» диэн саҥа номинация эбилиннэ. Уруккута «анал» статустаах этэ. Ону таһынан бириис пуондата улаатта: сүрүн номинацияларга үһүс миэстэ уонна анал номинацияларга кыайыы иһин бириис урукку 100 000 солкуобай оннугар 200 000 солкуобайга тэҥнэстэ.
Күрэс көҕүлээччитинэн РФ Бырабыыталыстыбатын бэрэссэдээтэлин солбуйааччы, РФ Бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ Юрий Трутнев буолар. Кини кыттааччыларга махтанан туран, кинилэр көмөлөрүнэн Арассыыйа ураты сирдэрин биллэриигэ, саҥа маршруттары арыйыыга улахан кылааттарын бэлиэтээтэ. Кини этэринэн, Уһук Илин уонна Арктика диэки интэриэс улаатан иһэр.
Саха сирин Ил Дархана Айсен Николаев бэлиэтииринэн, бу күрэх чэрчитинэн Саха сирин туристар уонна мүччүргэннээх сырыылары сэҥээрээччилэр ортолоругар тардар киин быһыытынан сайыннарыахха наада.
Бастыҥ видеоҕа сүрүн бириис – 3 мөлүйүөн солкуобай. Иккис миэстэҕэ 300 000, үһүс миэстэҕэ 200 000 солк. Улахан дьон да, 10-тан үөһээ саастаах оҕолор да, улахан киһи хонтуруоллуур кыттыахтарын сөп. Сиһилии: https://www.sakha.gov.ru/news/47013 сигэнэн ааҕыҥ.