Биһиги көлүөнэ дьоҥҥо үүнэр-сайдар кэскилбитин түстээбит, дьон туһугар кыһаллар-мүһэллэр, үлэлиир, тэрийэр дьоҕурбутун сайыннарбыт, олоххо дьулуурдаах суолбутун арыйбыт комсомол тэрилтэтэ буолара саарбаҕа суох. Ыччат гиэнэ саамай дьоҕурдааҕа талыллан, комсомол обкомун аппаратыгар үлэлииллэрэ. Комсомол обкомун аппаратын салайар үлэһиттэрин өрөспүүбүлүкэ ыччата, комсомольскай актива эрэ буолбакка, бары кэриэтэ билэллэрэ.
Ол мээнэҕэ буолбат. Оччолорго комсомол обкомун үлэһиттэрэ ыччат киэҥ маассатын кытары ыкса сибээстээхтик үлэлииллэрэ. Элбэхтик оройуоннарга, үлэ кэлэктииптэригэр сылдьаллара, араас сэминээрдэри, мунньахтары ыыталлара. Комсомол лииньийэтинэн ыытыллар араас өрүттээх, киэҥ далааһыннаах үлэлэр өрөспүүбүлүкэ, оройуон хаһыаттарыгар, араадьыйанан киэҥник сырдатыллаллара. Оччотооҕу ыччат идеологическай, култуурунай-маассабай үлэҕэ киэҥник тардыллара. Онон ыччат бэйэтин лиидэрдэрин туһунан бэркэ билэрэ уонна тус олоҕор холобур оҥосторо. 1960-с сылларга өрөспүүбүлүкэ ыччатыгар киэҥник биллэр биир оннук киһинэн Василий Кириллин этэ. Василий Васильевич туһунан өссө 1960-с сыллар саҕаланыыларыгар ЫБСЛКС Сунтаардааҕы райкомун сэкирэтээринэн үлэлии сылдьан билэр этим. Кини оччолорго «Молодежь Якутии» хаһыакка, онтон «Эдэр коммунистка» отдел сэбиэдиссэйинэн үлэлээбитэ.
Сунтаар райсоветыгар үөрэх отделын сэбиэдиссэйинэн үлэлээбит, олус ытыктанар аҕа табаарыһым Прокопий Иванович Егоров «Молодежь Якутии» хаһыакка эрэдээктэринэн үлэлээбитэ. Кинилиин элбэхтик көрсөн кэпсэтиибитигэр икки тылынан нууччалыы-сахалыы үчүгэйдик суруйар, үүнэн иһэр талааннаах суруналыыс Василий Кириллин туһунан бэрт иһирэхтик ахтара. Онтон Орджоникидзевскай оройуонугар комсомол райкомун сэкирэтээринэн талыллан үлэлиир кэмнэрбэр Василий Васильевиһы кытары чугастык билсибиппит. Кини ол кэмҥэ ЫБСЛКС обкомун пропагандаҕа отделын сэбиэдиссэйин солбуйааччынан үлэлиирэ. Кини бэйэтэ Орджоникидзевскай оройуон I Дьөппөн нэһилиэгиттэн төрүттээх этэ уонна кини аймах-билэ дьоно, убайдара оройуоҥҥа ытыктанар дьон эбиттэрэ. Василий Васильевич оройуонун дьонун-сэргэтин, оройуон кыһалҕаларын туһунан миэхэ кэпсээн, сүбэлээн улаханнык көмөлөһөрө. Дьокуускайга киирдэхпинэ кинини көрсөн, кэпсэтэн, сүбэтин-аматын ылан тахсарым.
Кэлин мин оройуонтан Хабаровскайдааҕы үрдүкү партийнай оскуолаҕа, онтон атын оройуоннарга, кэлин өрөспүүбүлүкэ салалтатыгар үлэлиир сылларбар сибээспитин сүтэрбэтэхпит. Кини кэлин комсомол обкомугар үс сыл идеологияҕа сэкирэтээринэн үлэлээбитэ. Онон кинини өрөспүүбүлүкэҕэ ыччат хамсааһынын сайдыытыгар, ыччаты бары өттүнэн дэгиттэр дьоҕурдаах гына иитиигэ сыралаһан туран, таһаарыылаахтык үлэлээбит киһинэн ааҕабын.
Кэлин өрөспүүбүлүкэҕэ «Кыым», «Социалистическая Якутия» хаһыаттарга үлэлээбит сылларын кэллиэгэлэрэ олус үрдүктүк уонна истиҥник санаан кэпсииллэр. Ол курдук, Сунтаарга райсовет бэрэссэдээтэлинэн үлэлии олордохпуна, командировкаҕа саха суруналыыстыкатын аксакаала Григорий Нынныров кэллэ. Истиҥник кэпсэтии кэмигэр эттэ: «Табаарыһыҥ Василий Кириллин бэркэ үлэлиир. «Кыым» хаһыаппыт эппиэттиир сэкирэтээрэ, тутаах киһибит. Дьэ, матырыйаал ис хоһоонугар эрэ буолбакка, тылыгар-өһүгэр, бэриллэр информация суһалыгар олус улахан суолтаны биэрэр. Хойгур соҕус матырыйаалы хаһыакка аһарыам диэн ким да санаммат. Кытаанах киһи, үчүгэй ыччат», — диэбитин өйдүүбүн. Бу кырдьаҕас, этэргэ дылы, «суруналыыстыка дьыалатыгар буут тууһу сиэбит, үлэлиирин тухары сурдурҕаччы суруйбут, ол да буоллар бөрүөтэ элэйбэтэх» улахан суруналыыс бэйэтин кэллиэгэтин туһунан үтүө сыанабыла этэ.
Василий Васильевич Кириллин 1991 сыл саҕаланыаҕыттан 11 сыл устата «Саха сирэ» хаһыат сүрүн эрэдээктэринэн үлэлээбитэ. Ити кэмнэр бутуурдаах, адьас үтүө да, мөлтөх да санаалар өрүтэ турсар, бүтүн дойду экэниэмикэтин эрэ да буолбакка, дьон өйүн-санаатын уһугуннарар, аныгылыы тыыҥҥа иитэр былдьаһыктаах кэмнэрэ этэ. Саха дьонун омук быһыытынан үрдүктүк билиниитин, национальнай култуурата, үгэстэрэ, искусствота сайдыытын саҥалыы ырыынак экэниэмикэтигэр, өрөспүүбүлүкэ дьонун сыһыарыы, олох-дьаһах саҥалыы үөрүйэхтэригэр иитии – бу оччотооҕу кэм уонна Бастакы Бэрэсидьиэн М.Е. Николаев историческай соруктара этэ. Ити үлэҕэ маассабай информация средстволара, хаһыаттар оруоллара сүҥкэн суолталааҕа. Бастакы Бэрэсидьиэн информация сүрүн уорганыгар салайааччынан Василий Васильевич Кириллини туруорбута. Ол түбэспиччэ буолбатах. Василий Кириллин бастаан Үрдүкү Сэбиэт Бэрэссэдээтэлэ, онтон өрөспүүбүлүкэ Бастакы Бэрэсидьиэнэ Михаил Ефимович Николаев чугастык билэр доҕоро эрэ буолбакка, кини биир санаалаах, эрэллээх соратнига этэ. Ол миссиятын Василий Васильевич 11 сыл устата чиэстээхтик толорбута. Ол кэмнэргэ «Саха сирэ» өрөспүүбүлүкэ олохтоохторун таптаан ааҕар, эрэнэр, итэҕэйэр, элбэх саҥаҕа үөрэтэр хаһыаттарынан буолбута.
Онон Василий Васильевич Кириллин өрөспүүбүлүкэҕэ саҥа үйэни, саҥа олоҕу, саҥа өйү-санааны уһансааччынан буолбута. Ол эппиэтинэстээх историческай миссиятын чиэстээхтик толорбута.
Климент Иванов, госсулууспа бэтэрээнэ,
СӨ бочуоттаах олохтооҕо