Ленскэй оройуонугар Пеледуйга ыам ыйын 11 күнүгэр уу таһыма сыыйа намтаан эрэр.
Бу туһунан «Лена» суһал бөлөх иһитиннэриитин СӨ гражданскай көмүскэлин уонна нэһилиэнньэ олоҕор-дьаһаҕар куттал суох буолуутун хааччыйыыга миниистир Дмитрий Лепчиков салайааччылаах 2026 с. сааскы халаан уутун куттала суох ааһыыга суһал ыстаабын мунньаҕар иһитиннэрдилэр.
—14:00 чаастааҕы туругунан Витим бөһүөлэк аттыгар Өлүөнэ өрүскэ уу таһыма 1010 см тиийбит, биир чаас иһигэр уу 63 см түспүт. Муус сэдэхтик барыыта көстөр. Чугастааҕы кэмҥэ уу түһүүтэ салҕанан барыаҕа. Пеледуйга кэнники чаас иһигэр уу таһыма 1305 см тиийэ намтаабыт, муус харыыта эстэн, муус хойуутук барара бэлиэтэнэр. Пеледуйга уу күүскэ түһүүтэ, Пеледуйтан аллараа 38 км сиргэ баар Крестовскай гидропуост аттыгар харыы суох буоллаҕына салҕанан барыаҕа, — диэн Саха сиринээҕи УГМС начаалынньыга Людмила Мурашко иһитиннэрдэ.
Пеледуйга кутталлаах бэлиэ — 1200 см. Уу критическэй таһымтан өссө үрдүк, ол гынан баран намтыаҕа диэн «Лена» суһал бөлөх уонна муниципалитеттар бигэргэтэллэр.
Олохтоохторго быһаарар, өйдөтөр үлэ тиһиктээхтик ыытыллара бэлиэтэнэр. Кинилэр сибээһи тута сылдьалларыгар уонна официальнай иһитиннэриилэри кэтээн көрөллөрүгэр, уу кытыытыгар, муус устар сиригэр чугаһаабаттарыгар, официальнай көҥүл кэнниттэн эрэ дьиэлэригэр төннөллөрүгэр сүбэлииллэр. Ууга барбыт дьиэлэр олохтоохторо быстах кэмҥэ олорор пуун тэриллибитин да иһин, аймахтарыгар барбыттар.
Мииринэй оройуонун баһылыгын солбуйааччы Георгий Башарин иһитиннэрбитинэн, Арыылаах сэлиэнньэтигэр 20 тиэргэни уу ылбыт, Набережнай уулуссаҕа 4 дьиэҕэ уу киирбит, 22 киһи аймахтарыгар көһөрүллүбүт. Бу иннинэ быстах кэмҥэ олорор пууҥҥа көһөрбүт киһилэрэ эмиэ аймахтарыгар көспүт. Биэс самосвал Центральнай уулуссаҕа суолу кутууга, оҥорууга үлэлиир. Социальнай уонна олоҕу хааччыйар эбийиэктэр бары штатнай эрэсииминэн үлэлииллэр. Ынах сүөһүнү үрдүк сиргэ үүрэн таһаартаабыттар. Таас Үрэххэ уу таһыма намтаан эрэрэ бэлиэтэнэр, түөрт ууну сүүрдэр ханааба хаһыллыбыт.
Сиһилии: https://www.sakha.gov.ru/news/47838
СӨ Ил Дарханын уонна Бырабыыталыстыбатын пресс-сулууспата