2026 сыл от ыйын 13 күнүгэр Саха Өрөспүүбүлүкэтин Уус Маайатааҕы оройуонун суута 18 саастаах, кэллиэс устудьуонугар Арассыыйа Холуобунай кодексатын 318 ыстатыйатын 1 чааһынан (былаас бэрэстэбиитэллэригэр күүһүнэн өттөйүү) буруйдааҕынан билиниллибит холуобунай дьыаланы көрдө. Бу туһунан СӨ сууттарын холбоһуктаах пресс-сулууспата иһитиннэрэр.
Дьыала матырыйаалларынан, 2026 сыл бэс ыйын 19-20 күннэрин түүнүгэр полиция үлэһиттэригэр уопсастыбаннай миэстэҕэ бэрээдэги кэһии туһунан иһитиннэрии киирбит. Уус Маайа бөһүөлэгэр баар Албан Аат болуоссатыгар тиийбит полиция үлэһиттэрэ арыгы иһэ олорор эдэр киһини туппуттар. Полиция үлэһиттэрэ сокуону кэһиини тохтоторугар уонна кинилэри кытары отделга барсарыгар эппиттэр. Былаас бэрэстэбиитэллэрин сокуоннай ирдэбиллэригэр бас бэриниэн баҕарбакка, буруйдаах киһи күүһүнэн өттөйөн, илиилэринэн охсубут, атахтарынан тэбиэлэбит, формаларыттан харбаабыт, күүстээхтик утарыласпыт уонна куота сатаабыт. Полиция үлэһиттэрэ куолаан туппуттар уонна итирдэр утаҕы испитин бэрэбиэркэлээри Уус Маайатааҕы киин балыыһаҕа илдьибитэр. Балыыһа дьиэтигэр тиийэн баран эдэр киһи, тутуллубутуттан кыыһыран, биир полиция үлэһитин төбөтүнэн биирдэ саайбыт. Соруйан, күүһүнэн өттөйөн, былаас бэрэстэбиитэллэрин үлэлэрин харгыстаабыт, ону тэҥэ полиция үлэһиттэрин доруобуйаларыгар охсууну оҥорбут, эттэрин-сииннэрин эчэппит.
Сууттанааччы көрдөһүүтүнэн холуобунай дьыала ураты бэрээдэгинэн көрүллүбүт, бириигэбэри ылыныы содулларын кини өйдөөбүт.
Суукка эдэр киһи буруйун толору билиммит, кэмсиммит уонна эмсэҕэлээбиттэртэн бырастыы гыналларыгар көрдөспүт.
Бары быһыыны-майгыны учуоттаан, ону тэҥэ буруйу чэпчэтэр (буруйу билинии, оҥорбутуттан кэмсинии) уонна сымнатар түгэннэр суохтарын иһин, суут эдэр киһини буруйдааҕынан билиммит итиэннэ киниэхэ 100 000 солкуобай кээмэйдээх ыстараабы анаабыт.
Устудьуон сынньанарын оннугар үлэ булуммут уонна бириигэбэр сокуоннай күүһүгэр киирбитин кэнниттэн 60 күн иһигэр ыстараабын төлүөн наада.
Суут бириигэбэрэ сокуоннай күүһүгэр киирэ илик, онон ааһыныллыан сөп.