Саха Өрөспүүбүлүкэтигэр РФ Бэрэсидьиэньэ Владимир Путин көҕүлээбит «Инфраструктура для жизни» национальнай бырайыагын «Коммунальнай инфраструктураны модернизациялааһын» федеральнай бырайыагын чэрчитинэн, 2026-2027 сылларга Сунтаар сэлиэнньэтин уунан хааччыйыы систиэмэтин модернизациялааһын иккис түһүмэҕэ олоххо киллэриллэр.
Бырайыак быһыытынан, уунан хааччыйар 12,8 килэмиэтир магистральнай ситимнэр уонна носуос ыстаансыйата тутуллаллар.
Билиҥҥи түһүмэх — 2023 сыллааҕы бастакы түһүмэҕи салҕааһын. Сунтаарга сууккаҕа 1100 кубометр ууну биэрэр кыамталаах уунан хааччыйар систиэмэ оҥоһуллубута.
«Биһиги сэлиэнньэбитигэр олус үчүгэй сонун. Уунан хааччыйыы систиэмэтин модернизациялааһыны салҕааһын -– Сунтаар сайдарыгар дьоһун суолталаах хардыы. Сүрүнэ -– олохтоохтор ыраас уонна куттала суох иһэр уунан хааччыллалларын, саҥа комплекс үлэтэ эрэллээх уонна туруктаах буоларын туһугар», -– диэтэ Сунтаар улууһун олохтооҕо Иван Егоров.
Иккис түһүмэх үлэтэ бүттэҕинэ, систиэмэ гидравлическай характеристиката тупсуоҕа, ситим хаайтарар учаастактара суох оҥоһуллуохтара.
СӨ Ил Дарханын уонна бырабыыталыстыбатын пресс-сулууспата