Бүгүн социальнай ситимнэргэ Сунтаар улууһугар өрүскэ кирдээх күүгэн тахсыбытын туһунан айманан үгүстүк кэпсэттилэр. Итиэннэ «Экобот Якутии» чат-ботка суруйаннар, СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтэ маннык харданы биэрдэ.
— Туһааннаах иһитиннэрии киирээтин кытары Кэмпэндээйи үрэҕэр Сунтаардааҕы экологическай надзор судаарыстыбаннай иниспиэктэрдэрэ барбыттара. Исписэлиистэр кытылы уонна уу туругун чинчийдилэр. Кэмпэндээйи үрэҕиттэн уонна Бүлүү өрүстэн уу боруобатын ыланнар, Ньурбатааҕы анал лабаратыарыйаҕа ыыттылар.
Барыллааһын чахчыларынан, бу химичэскэй киртийиини уонна техногеннай саахалы кытары сибээһэ суох. Бу күннэргэ улууска нуорматтан элбэх ардах түһэн, уу таһыма үрдээн, оту-маһы булкуйан, итинник күүгэннэр тахсыбыттар. Онон, айылҕа көстүүтэ буолар. Маны таһынан, Кэмпэндээйи үрэҕин уута туустааҕынан, үрдүк минерализациялааҕынан биллэр, — диэн министиэристибэ быһааран эттэ.
