Ааспыт суукка иһигэр Саха сиригэр 145 гектар уопсай иэннээх түөрт ойуур баһаара умуруорулунна.
Уот турбут сирдэрэ Уус Маайа, Кэбээйи, Чурапчы улуустарын сирдэригэр-уоттарыгар бохсулуннулар. Бу туһунан СӨ Экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы, өрөспүүбүлүкэ сүрүн лесничэйэ Андрей Коноплев иһитиннэрдэ.
Ааспыт сууккаҕа өрөспүүбүлүкэ сиригэр-уотугар 47 379 гектар иэннээх 27 ойуур баһаара баар. Баһаардар Алдан, Амма, Үөһээ Бүлүү, Өлөөн, Орто Халыма, Мииринэй, Нерюнгри, Кэбээйи, Томпо, Уус Маайа уонна Чурапчы улуустарыгар бэлиэтэннилэр. Ойуур баһаардарын умуруорууга 439 киһи уонна 13 тиэхиньикэ үлэлии сылдьар.
Салгынынан кэтээн көрүү Амма, Үөһээ Халыма, Ленскэй, Мииринэй уонна Уус Маайа улуустарыгар ыытыллар, уопсайа 5 көтөр аал үлэлиир. Ону таһынан, Уус Маайа уонна Орто Халыма улуустарыгар үлэһиттэри уонна тэрили көһөрүүгэ 2 Ми-8 вертолет туһаныллар. 11 лесничество сиригэр-уотугар сиринэн кэтээн көрүү барар.
Харыстанар зона иһигэр ойуур баһаардарын бастакы сууккаҕа умуруоруу көрдөрүүтэ 99,16% тэҥнэһэр.