Айаҥҥа чымадааны соһо сылдьыбат курдук, эрдэттэн буостанан ыытыахха сөп эбит. Бу туһунан Арассыыйа Буостата иһитиннэрэр.
Багааһа суох билиэттэр быдан чэпчэки буолаллар. Холобур, 20 киилэ оннугар 5 киилэ көҥүллэнэр багаастаах билиэттэр бааллар. Маннык түгэҥҥэ эрдэттэн бэлэмнэнэн, хас да күн иннинэ 20 киилэҕэ диэри ыйааһыннаах чымадааны буостанан ыытыахха сөп. Бириэмэҥ тиийбэт буоллаҕына, EMS (суһал тиэрдии ситимэ) курьерын ыҥыраҕын, кини дьиэҕэр кэлэн, баһыылкаҕын ылан барар. Биллэн турар, эбии төлөбүргэ.
Онтон көтөн тиийэн баран, буоста отделениетыттан баран ылаҕын. Бу хас да куоракка тохтоон, хонон ааһар, ыраах көтөр дьоҥҥо эмиэ табыгастаах. Вокзалга чымадааннарын бэрийэ сылдьыбаккын. Маны тэҥэ, элбэх кэһиини атыыласпыт буоллаххына, анарааттан бэйэҥ олорор сиргэр эмиэ ыытыаххын сөп.
Оттон баһыылка ханна тиийбитин Буоста мобильнай сыһыарыытыгар трек-куодунан кэтээн көрөҕүн.
Ыксыыр киһи EMS (суһал буоста) өҥөтүнэн туһаныан сөп, оччоҕо баһыылка тиийиитэ өссө түргэтиир диэн Арассыыйа Буостатын пресс-сулууспата иһитиннэрэр.